Stor brann på Tysnes - seks av åtte næringsbygg har tatt fyr

Det brenn no i seks av åtte næringsbygg, som ligg i ei rekke.

Klokka 17:15 opplyser brannvesenet til NRK at det er kontroll på brannen, og at det ikkje lenger er spreiingsfare til andre bygg.

– Dei to siste bygga er ikkje ramma av brann, men kan ha fått vasskadar, seier fungerande vaktkommandør ved 110-sentralen, Børre Brekkvassmo.

Det pågår sløkking både frå land og frå sjø. Det er ikkje meldt om sakna eller skadde personar.

Kystvaktskip og redningsskøyte deltek i sløkkearbeidet

Mannskapar frå fire brannstasjonar har rykt ut til brannen, som blei meldt like før klokka 14 laurdag.

I tillegg hjelper kystvaktskipet «Tor» og redningsskøyta «Sundt» med sløkking av brannen. Sløkkeinnsatsen frå sjø har god effekt, ifølgje politiet.

Det bles kraftig i området, men det er no ikkje fare for spreiing til andre bygg enn rekka med bygg som er ramma.

Bygga var heilt nye

Bygga tilhøyrer oppdrettsselskapet Alsaker Fjordbruk, og ligg heilt nede ved kaikanten i bygda Onarheim på Tysnes i Sunnhordland. Dei innheld kontor, møterom og auditorium.

Bygga har vore under oppføring i fleire år, og nærma seg no ferdigstilte, skriv Bladet Tysnes.

Det er meldt om mykje røyk i området. Bebuarar må lukka vindauge og vurdera å trekka seg lenger unna området som er utsett for røyk, oppmodar politiet om.