Storbrann ved vindusprodusent

Ingen personar skal vere skadd, opplyser operasjonsleiar Anders Oppedal ved Sør-Vest politidistrikt, men det er mykje og svart røyk på staden.

Han kjem med ei viktig melding om at alle i området må halde vindauge og ventilar lukka og unngå å bli eksponert for røyken.

Brannen vart meldt like før klokka ni, og brannvesenet rykte ut frå tre brannstasjonar.

Store styrker med på sløkking

Vaktleiar i Rogaland brann og redning, Svein Nesse, seier dei har sendt 8 bilar til brannen med over 20 brannmannskap.

Brannen er ikkje under kontroll og det er fare for vidare spreiing i bygget, seier Nesse.

Oppdragsleiar i politiet, Sigbjørn Staveland Sørenes, opplyser at det skal ha blitt uført takarbeid i forkant av brannen.

Forsøker å avgrense skadane

Innsatsleiar i politiet, Olav Neteland, seier brannen ser ut til å ha starta i taket. Brannen starta i den gamle delen av fabrikken.

Brannvesenet konsentrerer no innsatsen for å forsøke å hindre at brannen spreier seg til heile bygget.

Gilje Tre er ein stor produsent av vindauge og dører som leverer til heile Noreg.