Supermåling: Austlandet sikrar raudgrønt fleirtal

12 dagar før valet presenterer NRK den siste av to supermålingar.

I løpet av to veker midt i august er 15.200 veljarar i alle valdistrikt spurde om kva dei ville stemt om det var val i dag.

Målinga viser at Sørlandet og Vestlandet ønsker seg eit regjeringsskifte, men at austlendingane bryt andre vegen.

I sum betyr det ei mandatfordeling på 88–81 i raudgrøn favør.

Norstat, som har utført undersøkinga, presiserer at leiinga svarer til mindre enn 100.000 stemmer. Eller rundt 3 % av dei som kjem til å stemme.

Sjå fleire av hovudfunna under.

Dette fortel den siste supermålinga til NRK:

• Framgangen er størst for MDG, KrF og Raudt.
• I tillegg til at dei har god klaring til sperregrensa, så er KrF inne med fleire direktemandat til Stortinget (to i Rogaland og éin i Møre og Romsdal).

• Støre-regjeringa ligg an til å fortsette, men må halde seg inne med fire støtteparti på Stortinget: SV, Sp, Raudt og MDG.
• Om MDG fell under den «magiske» sperregrensa, kan det endre heile reknestykket.
• Den same dynamikken gjeld på andre sida av «midtstreken»: Eit borgarleg fleirtal står og fell på at både KrF og Venstre «smyg seg» over sperregrensa, og at nokon på motsett side (mest sannsynleg MDG) ikkje gjer det.
• Alle «sperregrense-kameratane» greier det magiske firetalet med (ganske) god margin.

• Utjamningsmandata fordeler seg slik: SV (5); Venstre (4); MDG (4); Raudt (3); KrF (2); Senterpartiet (1).
• Småpartia er utraderte, men Pasientfokus snusar på eit mandat i Finnmark.
• Framstegspartiet er større enn Høgre i alle distrikt bortsett frå Oslo.
• Høgre går tilbake frå supermålinga i mai, og er berre nest størst i eitt distrikt (Oslo). Ellast er partiet på 3. eller 4. plass i alle distrikt.

Listhaug: – Naturleg at det største partiet får statsministeren

I supermålinga har Frp fleire mandat (41) enn Høgre, KrF og Venstre har til saman (40).

Tysdag formiddag gjekk Kristin Clemet, som er leiar i den liberal-konservative tankesmia Civita, ut med ei bønn til den borgarlege koalisjonen om å gjere det tydelegare at det er Solberg – og berre henne – som er statsministerkandidat på blå side.

Resonnementet bygger på at høgresida må få med seg lilla-veljarane om dei skal vinne valet, og at desse treng ei forsikring om at dei ikkje «risikerer» å gjere Listhaug til statsminister.

Konfrontert med dette svarer Sylvi Listhaug at det er «naturleg at det største partiet får statsministeren»:

– Den einaste måten vi kan vinne på er at vi hentar veljarar over til blå side. Det er det per nå stort sett Framstegspartiet som gjer. Så viss alle parti gjer jobben sin og hentar veljarar, så greier vi å få til eit nytt fleirtal.

– Mange er lei av at nesten ingen snakkar om klima

– Valet ligg an til å bli ein skikkeleg sperregrensethriller, seier MDG-leiar Arild Hermstad.

For fire år sidan var partiet 1721 stemmer unna sperregrensa.

Det freistar ikkje til gjentaking, symbolisert ved at nestleiar i partiet, Ingrid Liland, har søkt skatteetaten om å byte namn til «Ingrid Sperregrensen Liland». I kampen for firetalet skal ingenting vere uprøvd.

Hermstad peikar på to grunnar til at partiet trendar oppover, og kan bli garantisten for eit raudgrønt fleirtal.

– Vi snakkar med veldig mange som er lei av at nesten ingen snakkar om klima, og folk vil at Noreg skal gjere meir for Palestina. Eg trur det er noko av grunnen til at vi veks nå, men vi tar ingenting for gitt.

Hordaland-kandidat Sveinung Rotevatn (V) argumenterer for at det er høgresida som er nøkkelen til ein ny og meir offensiv klimapolitikk:

– Venstre er det einaste miljøpartiet som både vil og realistisk sett kan kome i regjering etter valet, seier han.

– Venstresida sine miljøparti har gitt blankofullmakt til fire nye år med Arbeidarpartiet sin stilleståande klimapolitikk.

Sjå fleire reaksjonar på supermålinga under.