Torgeir Fonnlid la ned eit heilt livsverk ved Det Norske Teatret

Av Kjersti Horn

Torgeir Fonnlid døydde måndag 17. februar, 82 år gammal. Over halvparten av levetida si var han knytt til Det Norske Teatret. Han debuterte som Diesel i «West Side Story» i 1965 og hadde si siste rolle sesongen 2008/2009 i «Slottet» av Kafka. I løpet av dei 44 åra han var ved teateret gjorde han ei rad større og mindre roller, frå tittelrolla i «Pukkelryggen» og høvding Bromden i «Gaukereiret» til Jørgen i «Fuglane», Mannen i «Personkrins 3:1» og Journalisten i «Bikubesong». Mange hugsar han òg frå dramatiseringa av Halldor Laxness’ roman «Salka Valka». Han har gitt ut dikt på Kagge Forlag og medverka i ulike produksjonar for film, TV og radio.