Tre snøskred på kort tid: Politiet med tydeleg åtvaring

Det har vore ein hektisk ettermiddag for redningsmannskap og naudetatar i Troms.

På kort tid har det gått tre snøskred.

Like før kl. 17 gjekk det eit skred på Lakselvtindan i Tromsø kommune. Skredet har gått i ei renne.

Helikopter har vore i området. Dei har observert fire personar på toppen.

– Luftambulansen flyr ut, og politiet sine patruljar er på veg til staden, sa operasjonsleiar Robin Lindberg i Troms politidistrikt til NRK kl. 17.

Politiet ber folk om å vere forsiktige

Politiet har dei siste timane motteke fleire meldingar om snøskred i Troms politidistrikt.

Det er for tida betydeleg snøskredfare. Tidlegare onsdag gjekk skredvarslinga Varsom ut og åtvara om aukande snøskredfare i heile Noreg.

Politiet ber alle som ferdast i fjellet om å gjere gode vurderingar og vere forsiktige.

To skred tidlegare i ettermiddag

Like etter kl. 15 gjekk det skred på Bentjordstinden i Tromsø.

Ingen vart tekne av skredet.

Det var meldt om spor inn i snøskredet, og åtte personar vart observerte i området.

På Middagstinden på Kvaløya gjekk det skred like før kl. 13.30 onsdag ettermiddag.

Heller ikkje der vart nokon personar tekne av skredet.