1 day ago
6
Vegvesenet opplever meir aggressiv køyring enn før. I Oslo treng vegarbeidarane hjelp for å få rydda vegane.
Publisert 13.04.2026 15:32 Sist oppdatert 24 minutter siden
Store lastebilar og maskiner har samla seg på ein bensinstasjon på Skøyen, vest i Oslo.
Arbeidarane gjer seg klar for å rydde E18 for grus og boss som har samla seg opp gjennom vinteren.
Denne kvelden er det strekninga mellom Lysaker og Skøyen som står for tur.
– Det blir enorme mengder grus. Det er om lag 2000 tonn i riksvegnettet vi skal fjerne no i løpet av denne vårreingjeringa, seier byggeleiar Petter Looy Nielsen i Statens vegvesen.
Mange stader kan arbeidet gjerast medan trafikken sig forbi. Men på denne strekka, der 80.000 bilar passerer kvar dag i snitt, må E18 stengast heilt i den eine køyreretninga for å sikre tryggleiken til arbeidarane.
– Det blir feia, spylt, plukka søppel, og det blir gjort anna vedlikehald, seier Nielsen om arbeidet som skal gjerast.
Farlege situasjonar
Det same arbeidet blir gjort over heile landet i desse dagar, hovudsakleg på natta.
Men sjølv om dei aller fleste føl skiltinga, så er det ikkje alle som respekterer arbeidet.
Dei som jobbar på vegane, kan bli utsett for farlege situasjonar.
Tysdag denne veka mista ein person førarkortet etter å ha brote sperringa og køyrt inn på stengt E18 mellom Lillesand og Kristiansand. Nærare 80 personar jobba på vegen, ifølge Agderposten.
Også i Oslo har det skjedd liknande tilfelle.
– Vi har døme på det kvar einaste natt. Enkelte har for dårleg tid, mens nokon køyrer i rus, seier Nielsen.
Opplevinga hans er at det har vore ei negativ utvikling dei siste åra.
– Det har vore ei utvikling med meir aggressiv køyring, meir utolmod i trafikken. Mange føler at vi sperrar vegen for dei, seier Nielsen.
Vegvesenet har derfor samarbeida med politiet i Oslo dei siste åra når vårreingjeringa skal gjerast.
– Majoriteten av bilistane respekterer skiltinga, men så er det dessverre
unntak, seier politibetjent Vegard Nilsen.
For nokre dagar sidan køyrde ein person inn i ein tilhengar som markerte at vegen var sperra. Sjåføren var rusa, ifølge Nilsen.
– Det er tilfelle kvar einaste kveld som gjer at ein får bevist at det dessverre er nødvendig at politiet er til stades, seier han.
Det er Vaktmesterkompaniet som utfører arbeidet for Vegvesenet.
Driftsleiar Vidar Brekke seier at fleire av dei tilsette har gjort jobben i mange år, og understrekar at det stort sett går fint for seg. Dei trekk unna dersom det oppstår diskusjon om arbeidet.
– Då er det betre å trekke unna, og så tilkallar vi politi viss vi føler ubehag, seier Brekke.
– Skal heim til familien
Nielsen i Vegvesenet trekk fram at tryggleiken til dei som jobbar på vegen, er viktig.
– Det er menneske i vegen. Alle vil heim. Folk har ein familie å kome heim til, seier han.
Han seier at det kan vere ubehageleg for dei tilsette dersom folk ikkje respekterer vegsperringane.
– Det er det, men vi er drivne folk og unngår diskusjonar. Vi trekker oss roleg tilbake og forklarer at vegen er stengd, seier Brekke.
Om lag 30 personar jobba på E18-strekka førre veke.
– Det er mange som køyrer, men også mange som er ute og plukkar boss. Det er reparasjon av skilt og autovern, så vi har folk fysisk i vegbana. Derfor er det viktig at vi ikkje får nokon inn i sperringane, seier Brekke.
English (US)