Truleg mål for terrorplan

Fem iranske statsborgarar sit i varetekt i Storbritannia, mistenkte for å ha planlagt eit terrorangrep mot den israelske ambassaden i London. Det melder BBC, som viser til tryggingskjelder.

Arrestasjonane skjedde i ein nasjonal politiaksjon laurdag 3. mai, leia av britisk antiterrorpoliti.

Dei fem mennene blei arresterte i Swindon, vestre London, Stockport, Rochdale og Manchester. Dei er i alderen 24 til 46 år. 

Fire av dei er held i varetekt etter antiterrorlova og kan bli sitjande til minst 10. mai. Den femte blir lauslaten på kausjon, men med vilkår.

Målet var eit «spesifikt lokale»

Ifølgje antiterrorpolitiet var det eit «spesifikt lokale» som var målet for den mistenkte planen. 

MOGLEG MÅL: BBC og avisa The Times melder at dei mistenkte kan ha hatt Israels ambassade som mål. Foto: Frank Augstein/AP/NTB

Offisielt har ikkje politiet stadfesta kva slags bygg det er snakk om, men BBC og avisa The Times melder at det dreier seg om den israelske ambassaden i Kensington i London. 

Irans utanriksminister Abbas Araghchi «avviser bestemt» via X at Iran er involverte. 

Han legg til at dei er klare til å hjelpe i etterforskinga.

Politiet seier dei av operasjonelle tryggleiksgrunnar ikkje kan kommentere desse opplysningane.

Ei alvorleg sak

– Dette er ei alvorleg og raskt utviklande etterforsking. Vi har framleis søk på gang ved fleire adresser. Tryggleiken til folket er vår høgaste prioritet, seier Dominic Murphy, leiar for antiterroravdelinga i Metropolitan Police til BBC.

Store politiressursar deltar i aksjonen, og videoar frå pågripingane viser væpna politi som fører menn bort frå bustader. 

Dan Jarvis, innanriksminister, meiner dette er ei av dei mest omfattande antiterroroperasjonane og tryggleikstruslane Storbritannia har sett dei siste åra.

Etterforskinga omfattar husransakingar i Greater Manchester, London og Swindon. Politiet jobbar med å fastslå motivet og moglege koplingar til andre personar eller nettverk.

På same dag som desse arrestasjonane blei gjennomførte, blei tre andre iranske menn arresterte i ein separat aksjon. Dei er mistenkte for aktivitet knytt til framande statar og er siktar etter den nye tryggleikslova frå 2023.

Politiet ber folk vere vakne og melde frå om dei ser noko som verkar mistenkjeleg.