USA sin krig mot Iran gjer Kina sårbar

På veg inn til årets Folkekongress i Kina sin hovudstad Beijing kvilte skuggen av krigen i Iran over delegatane.

Laurdag angreip USA og Israel Kina sin viktigaste allierte i Midtausten, og Kina sin største leverandør av råolje.

Fleire fryktar auka priser på drivstoff, inflasjon og auka levekostnader for vanlege kinesarar.

Også fleire av delegatane i Folkekongressen er sterkt kritiske til krigen USA og Israel har starta i Midtausten.

– Kina vil definitivt stå opp for rettferd. Den nasjonale haldninga er veldig klar, seier Ge Bingzao, delegat til Folkekongressen, til NRK.

– Kina må hald fast på posisjonen sin og gjere jobben sjølv, seier Meng Fanying, også ho er delegat til Folkekongressen.

Heile 80 prosent av all oljen Iran eksporterer går til Kina.

Det gjer Kina særleg utsett dersom Hormuz-sundet blir stengt over lang tid.

– Utfordringar vi aldri har møtt før

Årets Folkekongress skjer berre få veker før Xi Jinping tar i mot Donald Trump i Beijing.

Statsbesøket vil skje under skjør våpenkvile i den pågåande handelskrigen mellom Kina og USA.

– Vi vil halde fast på vår eigen uavhengige utanrikspolitikk og halde oss på ein sti for fredfull utvikling, og oppretthalde internasjonal rettferd, sa statsminister Li Qiang til Folkekongressen i dag.

Då statsminister Li Qiang la fram arbeidsrapporten frå regjeringa, blei teknologisk sjølvstende nesten lagt fram som eit vere eller ikkje vere for Kina.

Statsministerens tale til Folkekongressen er Kina sitt svar på eller State of the Union-talen i USA.

– Vi står ansikt til ansikt med utfordringar vi aldri har møtt før. Vi planlegg for det verste, men prøver vårt beste. Vi må styrke oss heime for å vinne over utfordringar ute.

Å sikre seg nok energi er avgjerande for å skaffe nok og billig nok kraft til dei mange datasentera som krevst i Kina. Tek-kappløpet med USA er på mange måtar eit energi kappløp.

Lågaste vekstmål på fleire tiår

For 2026 er veksten sett til mellom 4,5 og 5 prosent, noko som er det lågaste på mange tiår.

Fleire Kina-analytikarar seier dette er det tydlegaste beviset til no på eit skifte til eit fokus på kvalitet i den økonomisk veksten.

Mellom anna skriv analyse- og research-avdelinga i The Economist at vekst i Kina ikkje lenger handlar vekst for vekstens si skuld.

Veksten skal handle om å gi folk auka inntekt, betre liv og skape jobbar til unge.

Kina ser at dei ikkje har råd til auka misnøye blant dei unge fødd rundt tusenårsskiftet, også kalla Gen Z.

Statsministeren understreka kor viktig det var å få opp det forbruket heime, og det blei varsla økonomiske tiltak for å få unge til å ønske å få fleire barn.

Budsjettet vil ha eit underskot på fire prosent som må dekkast opp av Kina sine statlege reservar.

Av dagens mjukare bodskap frå statsminister Li, var ei gladnyheit til Kina sine skolebarn. I fleire provinsar vil det allereie i år vere ekstra skolefri i april og mai.

Håpet er at foreldre skal ta med seg barn ut og på små feriar som igjen skal få meir fart på kinesisk økonomi.

Xis maktkamp med eigne generalar

Opninga av Folkekongressen torsdag skjer også kort tid etter at Xi Jinping har fjerna mange av sine høgast rangerte generalar.

Statsminister Li Qiang sa at den politiske korreksjonen av militæret vil fortsette.

Det store spørsmålet i Kina og resten av verda er om Xi er styrkt eller svekt etter fjerninga av general Zhang Youxia.

Zhang var Kinas høgaste rangerte mann i uniform.

I løpet av Folkekongressen vil det bli følgde nøye med på kven som kan komme til å fylle dei tomme stolane i Kinas militære leiing.

Det er liten tvil om at Kinas militære nå har ein svekt kommandostruktur.