6 days ago
21
Auka drivstoffprisar får store konsekvensar for lastebilnæringa. Statsministeren seier han vil vente med å vurdere tiltak.
Publisert 24.03.2026 12:56 Sist oppdatert nå
– Det varierer jo, men det er klart det er auke. Det følger vi veldig nøye med på. Så skal vi la det gå noko tid, for situasjonen er ustabil, seier statsminister Jonas Gahr Støre (Ap) til TV 2.
Måndag bikka literprisen for diesel 30 kroner nokre stader.
– Det har vart i litt over tre veker, så vi må få eit ordentleg heilskapsinntrykk før vi vurderer om det er naturleg med tiltak, seier Støre.
Vil ikkje gjere som Sverige
– I Sverige har regjeringa foreslått å redusere avgiftene midlertidig. Kvifor gjør ikkje du det same?
– Eg har sett ned med ei krone på bensin og 50 øre på diesel. Det har store kostnadar for budsjettet. Kor mykje det speler inn på prisar som går opp og ned, som no, det må vi sjå litt meir av, seier Støre.
– Men kvifor gjer du ikkje det same?
– Vi ønsker å sjå litt meir av om det er det mest treffsikre tiltaket, viss vi skal gjere noko for å betre folk sin økonomi i den situasjonen vi står i. Det er ikkje sikkert at det er dei grepa vi eventuelt kjem til å velje, seier Støre.
Varslar aksjon
Jan Erik Rafoss driv transportfirma i Kvinesdal, og blir derfor sterkt råka av prisauken.
Han har derfor sett i gang ein «køyr sakte-aksjon» på E39 vest i Agder.
Aksjonen skjer på fredag, når påskeutfarten startar.
– Det er dieselavgifter og prisgalopp som næringa ikkje klarar å henge med på. Og det er for å få politikarane på Løvebakken til å vakne, for det verkar jo ikkje som det er nokon vilje til å gjere nokon ting med dette, seier Jan Erik Rafoss.
Små marginar
Mange aktørar i lastebilbransjen har små marginar. Med ein prisauke på mellom 30 og 40 prosent på få veker kan det derfor få store konsekvensar for bransjen.
Auka transportkostnadar fører også til prisauke elles i samfunnet, seier administrerande direktør Knut Gravråk i Norges Lastebileierforbund.
– Transportnæringa verken kan eller vil absorbere dei auka utgiftene. Dette vil derfor føre til auka transportprisar, som vil forplante seg vidare i verdikjeda og føre til at alle varer og tenester vil auke i pris, seier Gravråk.
Gravråk viser til at listeprisen på diesel har auka med 6,36 kroner sidan krigsutbrotet i Midtøsten, med utgangspunkt i prisane tysdag.
Det utgjer ein prisauke på 38 prosent på dryge tre veker.
– Det er ganske brutalt for ei næring med små marginar der vi veit at drivstoffkostnadar kan utgjere opp mot 30 prosent av utgiftene til eit transportfirma, seier Gravråk.
Kan bli kø
Rafoss sitt firma har seks lastebilar. Ein bil brukar mellom 150 og 200 liter diesel kvar dag. Prisauken påverkar derfor økonomien.
– Det er sånn, skal du sitte heime eller skal du køyre deg til konkurs? Det er jo det som er spørsmålet no. Eg tør nesten ikkje tenke på kor fort det kan gå no, seier Rafoss.
Aksjonen skal skje på dagtid fredag. Den startar i Kvinesdal, før den svingar ut på E39 på Feda og endar i Mandal.
Fredag startar også påskeferien for mange, og det kan derfor bli køar.
Rafoss seier at aksjonen skal ta omsyn til eventuelle utrykkingskøyretøy, og dei vil halde kontakt med Vegtrafikksentralen.
– Vi oppretta eit arrangement, og der er det om lag 50 til no. Og så er det veldig mange bedriftseigarar rundt i Lister-regionen og bort til Kristiansand som har meldt sin framkomst, seier Rafoss.
English (US)