William (20) opnar opp om alvorleg ulykke: – Hugsar ikkje så mykje

– Eg hugsar ikkje så mykje sjølv av ulykka, men eg landa rett på kulen med hovudet.

William Bostadløkken frå Årvoll i Oslo var eit av landets største friski-talent. Men i desember gjekk alt gale.

11. desember 2025 fall friskiutøvaren stygt på ei trening i Steamboat i USA. 20-åringen vart lam frå ryggvirvel fem og seks og ned.

– På den første treningsdagen hekta eg skituppane i hoppkanten då eg gjorde ein «butter 10». Eg mista kontrollen og landa på hovudet og ryggen på kulen. Resultatet blei at eg brakk ryggen (fullstendig ryggmergsskade), skuldrene og eit par ribbein, skreiv han på Instagram.

Frå OL-bobla i Italia har venner sendt varme helsingar til ungguten.

Vil tilbake i bakken

No er Bostadløkken i betre forfatning, sit i rullestol og deltek i NRK si OL-sending tysdag kveld.

– Eg møter det som ein ny utfordring, som om det skulle vore eit nytt triks i bakken, fortel Bostadløkken.

Sidan tilbakekomsten til Noreg har dagane bestått av rehabilitering på Sunnaas sykehus.

Før ulykka var han i bakken nesten kvar dag. No er målet hans å bli heilt bra igjen.

– Eg ønsker så inderleg å få stå på ski igjen. Eg held motet oppe og er positiv.

Hyllar miljøet

Frå sjukesenga på Sunnaas visualiserer han nye triks. På dagtid øver han på å passere dørstokkar i rullestolen og jobbar kvar dag mot å betre styrken og mobiliteten.

Men slik stoda er akkurat no er det mykje arbeid som gjenstår.

– Det syg jo, det er ikkje noko kult. Det er ein rar kjensle og mentalt er det vanskeleg. Men eg trur at positivitet er den beste løysinga, seier Bostadløkken.

Han hyllar friskimiljøet, som har støtta han etter alt som har skjedd.

– Det er eit heilt spesielt miljø. Alle vil kvarandre det beste og løfter kvarandre opp. Ein finn ikkje den same kjensla i så mange andre idrettar, trur eg.

– Kvifor er det slik?

– Det er jo mykje risiko i denne sporten, og ein ønsker ikkje at andre skal skade seg. Folk som har vore litt utanfor andre miljø kan finne seg til rette i dette miljøet, forklarar Bostadløkken.

Ein av dei største talenta

Friski-ekspert Bendik Ulshagen Øye fortel at Bostadløkken er eit av dei store talenta i Noreg.

– Han er ein av dei beste vi har, på rekruttlandslaget og med i verdscupen. Han er eit skikkeleg arbeidsprodukt.

Derfor har han trua på at det kan vere ein veg tilbake i bakken for Bostadløkken.

– Er det ein som kan klare det er det ein seig kar som William, så det gler eg meg til å følge med på.

Fallet har gjort stort inntrykk på resten av friski-miljøet.

Prega lagkameratane

Tysdagens friski-gullvinnar i slopestyle, Birk Ruud, er ein god venn av 20-åringen.

Både Ruud og lagkameratane i OL er opne om at skaden til Bostadløkken har sett spor.

– Det med William har prega meg veldig mykje. Det var jo nesten ikkje til å tru, fortalde Ruud i forkant av konkurransen.

– Eg gjekk mange veker der eg berre tenkte på William. Eg måtte verkeleg grave djupt og liksom verkeleg løyse opp i ting og tang gjennom jula for å nå det stadiet eg er på nå, fortalde Ruud.

I NRK sitt OL-studio etter løpet rosar Bostadløkken Ruud sin prestasjon.

– Mentaliteten til Birk er heilt rå, det er fantastisk utført og kreativt laust, forklarar han medan han ser vinnarløpet til Ruud.

Bostadløkka er kjent med at NRK omtaler ulykka. Før konkurransen tysdag skreiv han at han gledde seg til å følge dei norske medaljehåpa i finalen.

– Det blir heilt rått med tre nordmenn i finalen. Dei er det beste laget i verda. Eg ønsker dei masse, masse lykke til, skreiv Bostadløkken i ein SMS til NRK.