Ibelin nominert til Emmy: Har samla inn over 2 mill. dollar til forsking

Dokumentaren er nominert i kategorien «Exceptional Merit In Documentary Filmmaking», ifølge nettsidene til prisutdelinga.

– Det er heilt fantastisk. Eg blei veldig overraska. Enormt stolt, seier regissør Benjamin Ree til NRK.

«Ibelin», regissert av Benjamin Ree, handlar om livet til Mats Steen.

Han gjekk bort i 2014 gjekk som følge av sjukdommen Duchennes muskeldystrofi.

Filmen handlar om korleis han fekk eit nettverk av venner online gjennom spelverda trass dei fysiske avgrensingane sine.

I 2019 skreiv NRK historia om Mats:

Samlar inn mykje

Serien «Severance» leier an i talet på Emmy-nominasjonar med totalt 27, ifølge nyheitsbyrået AFP.

For Benjamin Ree og dei andre som står bak Ibelin, var det ein overraskande nominasjon som kom tysdag.

– Det handlar om at filmen har gjort noko nytt – både formmessig, men òg rundt lanseringa og kva han har betydd for folk. At han har ført til endringar.

Gjennom filmen har det blitt samla inn over 2 millionar dollar for forsking på sjukdomen Mats Steen hadde.

– Eg trur filmen har ført til ein del diskusjonar, og det gjer denne prisen til ein veldig viktig pris og ei stor ære, seier Ree.

– Kan kjenne seg igjen

Trude Storheim er statssekretær i Kulturdepartementet for Arbeidarpartiet.

Ho meiner det er utruleg bra og viktig at Ibelin no er nominert til Emmy.

Ikkje minst fordi filmen har sett fokus på dette med online-verda og spel, som mange fekk ei aha-oppleving rundt.

– Dette er ting ein kan kjenne seg igjen i, uansett kvar ein bur, seier Storheim.

Far til Mats, Robert Steen, skriv på Facebook at det kom ein klump i halsen då han fekk vite om nominasjonen.

– Herregud, Matsemann – no skal vi til Los Angeles i september. No skal Ibelin på EMMY Awards – saman med dei største TV-stjernene, skriv Steen.