Mann og kvinne tiltalt: 14 hundar så avmagra at dei måtte avlivast

– Dette er ein alvorleg tiltale for det vi meiner er eit grov brot av dyrevelferdsloven, seier politiadvokat Knut Wold.

Det var i oktober i 2023 at dyreforholda i leilegheita til mannen og kvinna i Vest-Oppland vart oppdaga.

Der vart 14 hundar og 4 katter funne som Mattilsynet meiner var avmagra. Som følge av dette avliva dei 14 hundar og 1 katt av dyrevelferdsmessige årsaker.

• Utan brørne Holmlund kunne rømlingseventyret til Zavannah (6) enda tragisk:

– Avmagra og sjuke

– Hundane og kattene var avmagra og sjuke. Det er ikkje gjeve tilstrekkeleg fôr til dyra, seier Wold.

I tillegg til at dyra var avmagra kjem det fram i tiltalen at det vart funne store mengder avføring og urin i opphaldsromma til dyra.

Dei skal også ha latt vere å fjerne avføring frå eit hundebur slik at ein hund vart liggjande i dette.

Det er sett av to dagar til rettssaka i Vestre Innlandet tingrett. Saka startar til veka.

– Er ein del saker

Sidan det har teke over eit år å få behandla saka i rettssystemet kan dette få betydning for straffeutmålinga. Grovt brot av dyrevelferdslova kan straffast med fengsel i inntil 3 år.

– Kor uvanleg er slike saker i Innlandet?

– Det har eg ikkje oversikt over, men i Innlandet politidistrikt er det ein del saker for brot på dyrevelferdsloven, seier Wold.

• Snorre testar hundanes mentalitet:
  

Forsvarer: – Ingen kommentar

NRK har vore i kontakt med forsvarer til kvinna, advokat Heidi Christine Munkebye Birkeland.

– Korleis stiller din klient seg til tiltalen?

– Det har eg ikkje noko kommentar til, seier Birkeland.

Ho vil heller ikkje gje nokon andre kommentarar til saka.

NRK har prøvd å kome i kontakt med forsvarer til mannen, Hanne Lilleby, utan å lykkes.