Nytt prisoverslag blåser liv i håpet om ein skipstunnel

Kystverket melder at det er mogleg å kutte kostnaden til Stad skipstunnel med «fleire hundre millionar kroner».

I ei pressemelding seier Kystverket at dei har fått nye og rimelegare prisoverslag frå tre tilbydarar, og at dei gjennomfører ein ny forhandlingsrunde før jul.

Transportetaten skriv vidare at dei tar sikte på å levere eit endeleg tilbod til regjeringa «i god tid før revidert statsbudsjett» (i mai), og at bygginga av den første skipstunnelen i verda kan begynne året etter – om regjeringa og dei folkevalde vil.

Frank Sve (Frp) i transportkomiteen på Stortinget er blant dei som vil:

– No er det på tide at Austlandet unner Vestlandet eit større investeringsprosjekt, seier han.

– Veldig glad for at Stortinget overkøyrde regjeringa

Støre-regjeringa valde i sommar å stanse forhandlingane med tilvising til at det siste prisanslaget (9,4 milliardar kroner) låg utanfor den vedtekne kostnadsramma (5,3 milliardar kroner) med god margin.

Då Stortinget var gjort kjend med «den hemmelege stopp-ordren», svarte eit fleirtal med å instruere regjeringa til å fortsette forhandlingane likevel.

Regjeringa måtte derfor gjere retrett og gi Kystverket beskjed om å gjenopprette dialogen med tilbydarane.

– Eg er veldig glad for at fleirtalet på Stortinget overkøyrde Arbeidarpartiet, slik at vi får vite den endelegen prisen, seier stortingsrepresentant for Høgre, Anne Kristine Linnestad.

– No ser det ut til at dette arbeidet kan resultere i store kostnadskutt.

– Det er likevel ikkje snakk om milliardar

Om dei nye forhandlingane leier fram til eit prisoverslag som er politisk akseptabelt, er likevel ikkje gitt.

Fiskeri- og havminister Marianne Sivertsen Næss (Ap) seier til NRK at kutt i hundremillionersklassen er for lite i den store samanhengen.

– Det er likevel ikkje snakk om milliardar. Og det er jo det som er saka her.

– Har du ei helsing til dei som trur og håpar at skipstunnelen blir verkelegheit?

– At vi no får høve til å sjå endeleg pris, og at det er fullt og heilt opp til Stortinget å vurdere om det er forsvarleg å gå vidare.

– Samfunnsnytta blir ikkje godt nok fanga opp

Fleire rapportar har sett spørsmålsteikn ved samfunnsnytta til tunnelen, og i hovudstadspressa er prosjektet framstilt som eit monument over «manglande budsjettdisiplin», «offentleg sløsing» og «økonomisk irrasjonalitet».

På den andre sida har ei rekke prosjekt med lågare samfunnsøkonomisk nytte enn skipstunnelen fått klarsignal (sjå regjeringa si eiga oversikt her.)

– Om skipstunnelen skal vere eit symbol på noko, så må det vere kva ein heilskapleg kystpolitikk kan oppnå når staten satsar, seier Elisabeth Hatlenes, som er leiar i den nye Innsatsgruppa for Stad skipstunnel.

Ho legg til løypemeldinga frå Kystverket «skaper ny glød».

– Skipstunnelen har mykje å seie for dei som har havet som arbeidsstad. Den samfunnsnytta blir ikkje godt nok fanga opp i dagens modellar.

– Dette er viktige glør til bålet

Ifølge Kystverket har det vore 3 «relevante ulykker» på Stadhavet i perioden 2000–2021 (og 10 i perioden 1981-2000).

– Dette er ei bekrefting på at det var rett å fullføre anbodsprosessen, seier Britt Giske Andersen i Maritimt Forum Nordvest

Ho seier at slaget om Stad skipstunnel «er langt frå tapt» og dei nye prissignala er «viktige glør til bålet».

– No skal vi arbeide for å få fram mest mogleg kunnskap om prosjektet, slik at totalverdien er godt kjent for dei som til slutt skal ta den endelege avgjerda.