Telefonen koker før 17. mai: – Har ikkje tal på kor mange som ringer

– Det er jo kolossal vêrmelding og eg har ikkje tal på kor mange som ringer. Det er mange som spør om vi har plass og korleis 17. mai-feiringa blir, seier Silje Stee Vole (34), dagleg leiar på Juvasshytta.

Fjellverten ved Noregs høgste tak gler seg over vêrmeldinga som er sendt ut.

Laurdag på nasjonaldagen er det spådd over 20 varmegrader i store deler av Sør-Noreg, og også på Galdhøpiggen er det meldt full sol.

• Mens det er spådd full sol i sør er ikkje nordlendingane like heldige:

1.500 på toppen i fjor

Rett nok er det ikkje varmegrader på toppen, men strålande sol er det spådd. Og det lokkar folk til fjells.

– I fjor så var det 1.500 personar som var med og gjekk i tog opp til toppen. Det blir nok minst like mange i år, og vi merker stor pågang, seier Stee Vole.

Toget går som vanleg klokka 10 og det er fleire som bruker å gå den relativt lette turen til topps i bunad over Styggebreen.

Flagga bruker å vaie og på toppen av 2.469 meter over havet vil nasjonalsongen runge etter kvart.

– Nytt av året er at vi held hytta på toppen ope. Grunnen er at den feirar 50 år og vi opnar den som ein fin gest.

Overnatta på Galdhøpiggen

34-åringen var sjølv på toppen måndag og gjorde alt i stand til den store dagen.

– Det var heilt magisk å overnatte der og det var heilt vindstilt. Det går ikkje an å få det mykje finare.

Det er ikkje berre i Jotunheimen det går an å feire nasjonaldagen på ski.

Også på Finse er det mogleg å få ei kvit feiring.

På Finsehytta er det planlagt ei storstilt feiring, og det er spådd full sol og 11 varmegrader.

– Vi ser fram til ei storslått feiring her. Som vanleg blir det tog til toppen av Hardangerjøkulen der vi syng nasjonalsongen. Deretter blir det eit imponerande fallskjermshow med Voss fallskjermklubb der opp mot 100 fallskjermhopparar droppar, seier Sonja Rykhus.

Desse skal ha med seg eit 40 kvadratmeter stort flagg i lufta.

– Skikkeleg nasjonalromantisk med Hardangerjøkulen i bakgrunnen.

• Slik blir 17. mai på NRK

– Heilt spesielt å feire i fjellet

Ho er hyttevert saman med mannen sin Rune Sundt og melder om at det er smekkfullt.

– Vêrmeldinga er jo heilt fantastisk og skiføret er bra. Det er faktisk folk som har starta å bestille madrass på konferanserommet vårt, seier Rykhus.

Dei har tidlegare vore vertskap på Grimsdalshytta.

– Å feire 17. mai i fjellet er noko heilt spesielt. Ja, med knallblå himmel vil eg påstå at det er magisk.