Utlendingane strøymer til skianlegga: – It's brilliant!

– Skikøyring her er briljant! Mykje stillare enn i Frankrike, kor vi har vore fleire gonger.

Britiske Max Ellis (13) er på vinterferie i Trysil saman med broren, mora og faren. Alpinanlegget er stappfullt av turistar. Og enno fleire enn før snakkar britisk.

Trysil har lenge hatt ein del besøk frå England. Men i år er det ei auke på 24 prosent, fortel Gudrun Sanaker Lohne, som er destinasjonssjef ved Skistar Trysil.

Ho seier det er ei auke generelt i internasjonale gjester.

– Vi har veldig bra belegg i vinterferien. Danskane var her førre veke. Denne veka her så er det mykje engelskmenn og nordmenn, og så er det svenskar neste veke, seier ho.

Kronekursen hjelper på

Familien Ellis har brukt å ta skiferien sin til dei franske alpane, men valde Noreg i år. Ei svak krone var delar av grunnen.

– Det er billigare for oss. Dei franske alpane vart veldig dyrt, og her følast det betydeleg billigare, seier Denise Ellis.

Mannen, Robert legg til at prisane no ikkje skil seg så veldig frå London, så det kjennest ikkje dyrt for dei.

– Og med valutakursen som går ned litt, så utgjer det også ein forskjell, seier Robert Ellis.

Gudrun Sanaker Lohne seier dei har brukt mange år på å bygge seg opp som ein god skidestinasjon for utlendingar. Ho seier kronekursen nok hjelper på. Men meiner at dei får så mykje besøk blant anna fordi dei har eit godt familietilbod.

– Så det er veldig lett å vere gjest her. Det er det vi får mest tilbakemelding på, og så får vi ein ekstra draghjelp av valutaen.

• Det har vore ein snøfattig vinter i år, men i januar kunne dei juble mellom anna i Trysil.

Auke fleire plassar

Fleire av skidestinasjonane i landet melder om ei auke i utanlandske besøkande.

Espen Stensvold Rønning er marknadssjef for Alpinco som har Hafjell og Kvitfjell i Innlandet og Oppdal i Trøndelag. Han fortel om den best besøkte vinterferien nokosinne.

Han seier Kvitfjell i Innlandet har hatt ei auke på 25 prosent fleire utlendingar i år. I Hafjell er det 8 prosent vekst. Begge desse plassane er det danskar som drar opp talet.

Også i Hemsedal er det bra besøk frå utlandet, fortel dagleg leiar Richard Taraldsen for destinasjon Hemsedal. Dei merkar at kronekursen hjelper på, for no brukar turistane også pengar i restaurantane og butikkane.

– Daglegvarebutikkane i Hemsedal har hatt ei auke på mellom 20 og 30 % så langt i vinter. Det er mykje utlendingane som drar opp, fortel Taraldsen.

Stine Holt, dagleg leiar hos Narvikfjellet, seier dei er mindre enn mange anlegg lengre sør. Men dei har seld 60 prosent fleire heiskort enn i fjor, og har mange besøkande frå Tyskland, Sverige og Finland.

• Rett før vinterferien var E6 stengt, noko som betydde trøbbel for Espa Bolleland.

Passe stort i forhold til alpane

Hege Paulsen Bråtner i NHO reiseliv trur ikkje kronekursen er hovudgrunnen til auke av utanlandske turistar. Noreg er snøsikkert, og det har vore varierande forhold i Alpane, fortel ho. Dessutan trur ho mange synest anlegga i Noreg er passe store.

– Om du kjem frå Danmark og kanskje ikkje har stått så mykje på ski, så freistar det kanskje meir mellom passe stort norsk familieanlegg enn de svære anlegga i Alpene.

Men kronekursen kan gjere at turistane har moglegheit til å legge igjen fleire pengar hos destinasjonane dei besøker.

– For det gjør jo at det kan bli lønnsamt ikkje berre for skianlegget, men for kafeen i sentrum, for hotellet, for restauranten og for alle andre som lever av reiseliv i Noreg. Man kan jo også tenke seg at den svake krona gjør at nokon turistar har et litt større budsjett enn de kan bruke i Noreg, rett og slett, seier ho.