Adrian (23) er heilt ukjent i Noreg – er stor stjerne i sitt andre heimland

– Eg kjenner av og til på at eg skulle kunne språket litt betre, sjølv om vi kan nokre få ord. Det er ikkje like lett å synge med på nasjonalsongen.

Det seier Adrian Ugelvik (23) til NRK. Han er landslagsspelar på Filippinane som husar heile 117 millionar menneske.

Han er ein del av ein norsk trend der fleire og fleire spelarar vel å spele for sitt andre heimland. Desse spelarane har derfor ikkje lov til å representere Noreg på landslaget.

Likevel er kanskje vegen for lang til det norske landslaget, som husar verdsstjerner som Erling Braut Haaland, Martin Ødegaard og Alexander Sørloth.

Ugelvik er ein av fem norske landslagsspelarar på det filippinske landslaget. Landet har den ikkje fullt så prestisjefylte 146.-plassen på Fifa-rankinga. Noreg ligg til samanlikning på 38. plass.

Dermed kan spelarar som Ugelvik bli landslagsspelar, sjølv om han berre står registrert med 61 minutts spel denne sesongen for Brattvåg. Laget held til i norsk andredivisjon.

Ugelvik har blitt eit fast innslag i landslagstroppen og fått seg proffovergang til Thailand denne sommaren. Med det blir han ofte kjent igjen på gata i sitt andre heimland, Filippinane.

– Alle folk veit kven du er, du blir kjent igjen, fortel han.

På Filippinane er det basketball som er favorittsporten, likevel er fotballinteressa veksande i øynasjonen, påstår dei norske spelarane. Ugelvik fortel at det var stort for han å spele framfor 65.000 tilskodarar borte mot Indonesia.

– Det var heilt spinnvilt og mykje bråk. Det gjekk ikkje an å prate med kvarandre utpå der, minnast Ugelvik om kampen i fjor.

Da han blei skadd på slutten av kampen, strøymde det på med meldingar, og engasjement. Oppdateringa hans frå sjukehussenga fekk over 750.000 visningar på X.

– Det er kult når det blir mobilisert, fortel Ugelvik.

Drog til Noreg

I jakta på meisterskap har det filippinske fotballforbundet søkt gjennom dei europeiske ligaene på jakt etter spelarar med filippinsk bakgrunn. Det førte til at den daverande landslagssjefen Tom Saintfiet sette seg fleire gonger på flyet til Noreg.

Det har gitt resultat.

Eliteseriespelar Bjørn Martin Kristensen (23) er Filippinanes nye landslagsstjerne og har skåra tre mål på landslaget sidan debuten i mars. I førre kamp skåra han begge måla da Filippinane forsvarte gruppeleiinga i kvalifiseringa mot Tajikstan.

Majoriteten av spelarane på laget er personar som er vakse opp i andre nasjonar. Nå skal fleire nordmenn vere på veg den vel 9800 kilometer lange turen frå Noreg.

Har ein spelar først representert eit land på seniornivå, blir ein blokkert frå å representere eit anna, for eksempel Noreg.

På kvinnelandslaget til Filippinane har både Sara Eggesvik og Meryll Abrahamsen vore innom.

Det er ikkje første gong Saintfiet hentar nordmenn. I 2019 debuterte fire nordmenn for Gambia da belgiaren trena landet.

Fifas reglar opnar for at viss spelarar har ein besteforelder som er fødd i eit land, kan ein representere landet.

Sidan noregsbesøket i vår har den filippinske landslagssjefen blitt bytt ut med spanjolen Carles Cuadrat. Han har bakgrunn frå akademiet til Barcelona, men han fekk ikkje lange tida i sjefsstolen, og nå er det ei mellombels løysing på trenarplass.

– Ein enorm «boost»

Det er ikkje berre Filippinane som rekrutterer landslagsspelarar frå Noreg.

I fjor fekk Marius Mellemstrand Rabenorolahy (20) ei melding av ein ukjent profil på Instagram.

Etter den franske opningsfrasa, kom det fram at den ukjente kontoen hadde spora opp Rabenorolahy i tredjedivisjonsklubben Madla IL.

Instagram-kontoen forklarte at dei var på jakt etter spelarar med bakgrunn frå Madagaskar.

– Det var ganske vanskeleg å tru på, seier Rabenorolahy.

Etter litt kommunikasjon fram og tilbake fekk han bekreftinga.

– Lagkameratane mine i Madla jubla, hoppa og hypa meg opp når dei fekk beskjeden, seier han.

Rabenorolahy er halvt gassar ettersom far hans er frå Madagaskar. Frå han var seks månader til han var tre år budd han også på øya, men han rakk aldri å lære seg nasjonalsongen.

– Vi fekk beskjed om at det var ei forventning at vi skulle lære henne på samlinga, så heile laget øvde saman på lagsmøte før kamp, fortel Rabenorolahy og fortset:

– Eg skal prøve å lære han til neste samling i alle fall.

For 20-åringen er tydeleg på at dette har tent ein gneiste i satsinga mot profflivet.

– Dette er ein enorm «boost». Eg har lyst til å prøve å komme meg på A-laget etter kvart, seier Rabanorolahy.

Fleire nordmenn på veg

Ein av dei som er i prosess med å skaffe det filippinske passet sitt og dermed få moglegheita på landslaget, er Arendal-spelar og spiss, Julius Myrbakk.

Han blei ved eit slumpetreff oppdaga under ein cupkamp med Eik Tønsberg, då han skåra mot Fredrikstad i fjor. Da var den filippinske landslagssjefen på tribunen for å speide på to andre spelarar.

Men då landslagssjefen fekk eit tips frå ein Filippinsk-fankonto på Instagram om at målskårar Myrbakk hadde filippinske anar, starta kontakten.

– Eg veit ikkje heilt korleis dei fann ut av det, men dei fann ut av det. Og då visste plutseleg landslagstrenaren også at eg var filippinsk, seier Myrbakk.

Nå ventar han på å få det filippinske passet sitt, som visste seg å ta lengre tid ein først antatt. Han håpar å få papira i orden og drøymer om å prestere framfor 60.000 tilskodarar.

– Det er jo på ein måte alle fotballgutars draum å spele på eit landslag. Det var kanskje ikkje det filippinske landslaget eg tenkte eg kom til å spele for, då eg var liten, eller håpa og drøymde på. Det var kanskje Noreg eller USA, seier Myrbakk som har multikulturell bakgrunn.