Arne Bye dømt til 16 år i fengsel

Det bekreftar Bye sin forsvarar, Eirik Svingen Bjørgo, til NRK.

Bye er dømt for 72 tilfelle av valdtekt og 82 tilfelle av å ha misbrukt si stilling for å oppnå seksuell omgang.

I tingretten blei Bye dømt til 21 år i fengsel, men anka dommen til Frostating lagmannsrett.

No har lagmannsretten konkludert.

– Vi er fornøgde med at lagmannsretten sitt fleirtal er fornøgd med vår argumentasjon og konklusjon om korleis jussen skal forståast, seier Bjørgo.

– No skal vi bruke tida godt til å gå gjennom dommen.

Lovendring gir kortare straff

Ankesaka mot Bye blei behandla 26.–28. november. Der skulle retten ta stilling til kor lang straff den tidlegare kommuneoverlegen skulle få.

Den tidlegare kommuneoverlegen blei i Trøndelag tingrett mellom anna funnen skuldig i 38 brot av § 292 i straffelova.

Paragrafen inneheldt bestemmingar knytt til valdtekt ved innføring av gjenstandar.

Strafferamma for brot på denne lova var 15 år. Når ein blei dømt for fleire brot, kan ein få seks år ekstra straff.

Da lovendringane som blir kalla samtykkelova trådde i kraft 1. juli finst ikkje paragraf §292 lenger.

Dermed er den øvre strafferamma for lovbrota Bye er dømt for no 16 år.

Trekte delar av anken

Opphavleg anka Bye heile dommen frå tingretten, men trekte seinare anken over skuldspørsmålet.

Det skjedde etter at Frostating lagmannsrett bestemte at skuldspørsmålet for berre 18 tiltalepostar skulle bli behandla.

Bye sin forsvarar, Frode Wisth, argumenterte for at mellom 14,5 og 15 år fengsel er riktig straff.

Han peikte mellom anna på at det at Bye trekte anken burde gi strafferabatt.

Det meinte han også at Bye sin tvangsprega personlegdomsforstyrring burde gi.

– Bye er einig i dag i at det ikkje høyrer heime å ha ei gynekologisk undersøking på 47 minutt. Men den gongen klarte han ikkje å avslutte, sa Wisth.

Han meinte også at Bye trekte deler av anken også burde gi lågare straff.

Påtalemakta la derimot ned påstand om 16 år i fengsel.

– Når ein les dommen, ser ein at domfelte sine handlingar har ramma i generasjonar. Vi finn mødrer, søstrer, venninner og naboar, sa statsadvokat Eli Nessimo i retten.