Desse skal dømme drapssak i ny NRK-reality

Kl. 13 startar haustlansering til NRK, med programleiarane Nora Svenningsen og Tete Lidbom direkte frå Studio 1 på Marienlyst.

Eit av dei nye programma som kjem på NRK i haust er den nye realityserien «Tiltalt».

Deltakarane er komikar Gaute Berg Næss, Forfattar Unni Lindell, musikar Bjarne Brøndbo, aktivist og humorist Anine Olsen og komikar Yousef Hadaoui.

Heilt nytt reality-konsept

I sentrum av realityserien står ei nervepirrande drapsgåte. Ei ung kvinne, med namnet Ariana er drepen, og den tiltalte er ektemannen.

Er han skuldig, eller ikkje?

Dette må kjendisane forsøke å finne ut av i lag som meddommarar. Spørsmålet er om dei vil klare å sjå forbi magefølelse og eigne fordommar og saman komme fram til ein rettferdig dom.

Gaute Berg Næss, som vann fjorårets sesong av «Forræder», er klar for å ta fatt på nye mord og mysterium.

– Kanskje eg kan vise ei litt anna side av meg sjølv enn det mange har sett før. Eg er ein stor krim-entusiast, ser spesielt mykje true crime og dokumentarar, seier han.

Næss fortel vidare at han kom meir inn i det enn han trudde.

– Vitna og skodespelarane var så dyktige at ein blei på ein måte litt lurt. Bevisa kjentest ekte ut. Vi måtte verkeleg bruke hjernekapasiteten vår. Det kjennest litt viktigare enn å berre lage eit tv-program, fortel Berg Næss.

Inspirert av ekte drapssaker

Krimforfattar Jørn Lier Horst har latt seg inspirere av ekte drapssaker, og har eksklusivt skrive ei helt ny historie for «Tiltalt».

– Å byggje opp saka har vore ei øving i å vege bevis, indisium og truverd med like stor tyngde på begge sider av skyldspørsmålet, understrekar han.

Jørn Lier Horst forklarar vidare at det skal vere vanskeleg å dømme den tiltalte.

– Samtidig som ein må skape eit solid forteljarmessig fundament slik at det faktisk er mogleg å gjere seg opp ein meining, legg han til.

Olsen, som er kjent for å delta aktivt i samfunnsdebatten og har spesielt utmerka seg på plattforma på TikTok, har alltid vore nysgjerrig på kva som skjer på innsida av ei rettssak.

– Det har vore mykje reality på skjermen, men ingenting som dette. Her får ein faktisk sjå kva som skjer bak lukka dører. Det er interessant å sjå kor ulikt vi tolkar den same informasjonen, fortel ho.

Reality-debut

Rollene som vitne og drapstiltalt i rettssaka vert spelt ut av skodespelarar. Medan advokatane i serien er Marius Dietrichson og Siri Ross Wessel. Dommar er Berit Reiss-Andersen.

Dette er fyrste gong Anine Olsen er med i reality.

– Det er spennande å bli plukka ut til å delta i eit slikt konsept. Eg har venta litt med å gjere TV og spesielt reality for det har vore skummelt, og eg er glad eg venta til eit slik prosjekt kom på bordet, fortel ho.

Serien er også reality-debuten til musikar Bjarne Brøndbo, han fortel at han vart overraska over kor tidleg nokon av deltakarane var med å konkludere og kor krevjande det var å skulle ta stilling til skuldspørsmålet.

– Eg måtte vike på nokon prinsipp eg ikkje hadde trudd eg kom til å vike på. Om det var eit godt val eller ikkje, gjenstår å sjå når dommen blir lesen opp, fortel Brøndbo.

Serien «Tiltalt» har premiere i november.