Distriktsopprør i Høgre: – Vil aldri akseptere tre frå Oslo

«Bunads-Høgre» varslar kamp på landsmøtet i februar, der partiet skal velje Erna Solberg sin erstattar og to nestleiarar.

Bakgrunnen er signala om at den leiartrioen berre vil bestå av «Oslo-folk» (Ine Eriksen Søreide, Henrik Asheim og Ola Svenneby).

– Dersom innstillinga endar med tre personar frå Oslo, så meiner eg valkomiteen leverer dårleg. Vi har da heldigvis flinke folk utanfor bomringen i Oslo òg, seier bergenspolitikar Eivind Nævdal-Bolstad (H).

Bergen Høgre har tidlegare insistert på at Peter Christian «PC» Frølich bør bli ein del av leiinga.

Laurdag varsla vestlandsalibiet – til stor overrasking – at han ikkje lenger er aktuell til nestleiarvervet.

– At mitt val også gir rom for eit så ekstraordinært politisk talent som Ola Svenneby som nestleiar, er personleg viktig for meg, forklarte Frølich.

– Tre stykk som trør skotøyet sitt på Karl Johan? Ikkje aktuelt

Bø-ordførar Sture Pedersen (H) seier til VG at han «ikkje kan sitte i ro og sjå på at Høgre vel tre personar frå austlandsområdet inn i leiinga».

– Gløym det. Tre stykk som trør skotøyet sitt på Karl Johan? Ikkje aktuelt, seier han.

Om valkomiteen ikkje justerer kursen, lovar han kamp på landsmøtet i februar, der den nye leiinga formelt blir peika ut.

Øygarden-ordførar Tom Georg Indrevik (H) kallar det «eit feilsteg» at Frølich ikkje lenger er ein del av diskusjonen.

– Det er eit tap. Dei innstilte er flinke folk, men for distrikts-høgre, kyst-høgre og for den fornyinga vi ønskte oss, så er Frølich den rette, seier han til NRK.

– Er Høgre verkeleg så maktblinde?

«Seriøst? Er Høgre verkeleg så maktblinde?» skriv politisk redaktør i Bergensavisen, Sølve Rydland.

Med tilvising til Stein Rokkan (sjå under), meiner han at Høgre – til liks med Arbeidarpartiet – er i ferd med å gjere seg skuldig i ein politisk «brølar».

– At ingen av dei to tradisjonelle styringspartia bryr seg om geografisk representasjon i toppleiinga si, fortel ein heil del om at dei to partia ikkje er opptekne av kor viktig denne dimensjonen er i norsk politikk.

Leiartrioen i Arbeidarpartiet består av Jonas Gahr Støre (Oslo), Tonje Brenna (Jessheim) og Jan Christian Vestre (Oslo sidan han var eitt år gammal).

Rydland legg til:

– Om denne sentraliseringspendelen får halda fram, vil ein svekka det enorme verdiskapingspotensialet langs kysten i vest og nord. Det er naivt å tru at dei austlandstunge partileiingane vil bety noko anna enn austlandsk politisk slagside.