Drakk amfetaminkaffi – så tok han barna med til badeland

Det var i september i fjor at det gjekk gale på ei påkøyringsrampe ved E18 i Arendal kommune. 

Ein bil hadde for høg fart, hamna utafor vegen, skrensa, trefte eit tre og rulla rundt.

Inne i bilen sat det ein vaksen mann og fire barn, alle under ti år. Bilen blei liggande opp ned.

No er mannen i 40-åra dømd i Agder tingrett.

Han var nemleg langt frå edru då han plasserte dei fire barna i bilen og sjølv sette seg bak rattet den føremiddagen.

Kaffi og narkotika

I retten erkjente han straffskuld og uttalte at han angra veldig på det han hadde gjort. 

Mannen hadde vore på fest heile natta før.

I løpet av natta og på tidleg morgon drakk han to sokalla «kaffidoktorar». 

Dei inneheldt kaffi, amfetamin, Xanor-tablettar, mjølk og sukker. I tillegg drakk han vodka og røykte cannabis.

Han visste «inderleg godt» at han ikkje skulle køyre etter å ha rusa seg, men følte seg ikkje påverka. 

– Barna maste og ville på badeland, og det var grunnen til at han gav etter og tok barna med, skriv tingretten om mannen si forklaring.

Her enda den tre mil lange fylleturen

Måtte i luftambulanse

Blodprøver viser at mannen var påverka av rus tilsvarande 1,2 promille ein halvanna time etter ulukka.

Av dei fire barna i bilen var to av dei hans eigne. 

Politibetjentar som kom til staden tenkte straks at det var ei alvorleg ulukke, kjem det fram i dommen.

Mannen fekk sjølv tre av barna ut av bilen, medan det fjerde barnet vart sitjande fast i bilen. Dette barnet vart vurdert som så sterkt skadd at det måtte sendast til Oslo universitetssjukehus med luftambulanse. 

Barnet fekk skader som sidan har gitt fråvêr frå skulen, samt andre utfordringar knytt til ulukka.

– Livsfare

Mannen er dømd til 45 dagar fengsel og må betale ei bot på 50.000 kroner. 

– Tiltalte har utsett sine eigne og andre barn for livsfare. Det står fram som tilfeldig at skadane på det eine barnet ikkje vart enno meir alvorlege, samanfattar dommarane.

Dei legg til at det er straffeskjerpande at mannen var godt kjent med korleis rusmiddela ville virke på han og at han tok ein bevisst sjanse då han køyrde av garde med barna.

Mannen får strafferabatt for å tilstå. Han må klare seg utan førarkort i 3,5 år og må betale 90.000 kroner i oppreisingserstatning til det skadde barnet.

Lise Ilstad er bistandsadvokat for barnet som vart hardast skadd i ulukka. På vegne av foreldra til barnet gir ho følgjande uttale:

– Som foreldre i eit slikt sakskompleks, der ein frykta for at barnet skulle overleva, finst det inga straff som kan gjera opp for den belastninga fornærma og familien har vorte påført. Dei håpar saka kan bidra til auka fokus på faren ved å setja seg påverka bak rattet. Familien vil elles nytta høvet til å takka alle som har stilt opp for fornærma og familien i tida kring og etter ulukka.

Forsvararen seier til TV 2 at dei ikkje ønskjer kommentere dommen.