Dronar skotne ned over Polen – forsvaret ber folk halde seg heime

Fleire russiske dronar kom i natt inn i polsk luftrom i samband med eit angrep i Ukraina, ifølgje det polske forsvaret.

– Det går føre seg ein operasjon i samband med dei gjentatte krenkingane av polsk luftrom, seier statsminister Donald Tusk.

Tusk har kalla regjeringa inn til hastemøte klokka 8.

Han seier også at Natos generalsekretær er blitt informert om korleis Polen handterer situasjonen.

– Dette er ei aggressiv handling som truar tryggleiken for innbyggjarane våre, skriv det polske forsvaret på X.

Alle polske tenester er sette i alarmberedskap, seier viseforsvarsminister Cezary Tomczyk, ifølge Reuters.

Polsk politi melder at dei fann ein øydelagd drone i byen Czosnówka klokka 05.40.

Angrep mot Ukraina

Det ukrainske luftforsvaret åtvara seint tysdag kveld om mange fiendtlege dronar over sentrale og nordaustlege delar av landet. Like før midnatt kunne ein høyre luftvernartilleri i hovudstaden Kyiv.

Det blei også meldt at nokre dronar hadde komme inn i luftrommet over vestlege delar av Ukraina, på veg mot byen Lutsk. Litt over midnatt varsla luftforsvaret at dronane var komme over i polsk luftrom.

– Dronar i Polen, på veg vestover mot byen Zamosc, skriv dei på Telegram.

Kort tid etterpå opplyste det polske forsvaret at dei sende militærfly på vengene for å sikre luftrommet i landet.

Fleire flyplassar stengde

USAs utanriksminister Marco Rubio er også informert om at russiske dronar har krenkt polsk luftrom, melder CNNs reporter Kaitlan Collins på X.

Polen har natt til onsdag også stengt fire flyplassar, inkludert hovudflyplassen Chopin i Warszawa på grunn av russiske droneangrep mot Ukraina.