Etterforskar skuleskyting i USA som terror

Onsdag morgon hadde skuleelevar samla seg til messe i den katolske skulekyrkje ved Annunciation Catholic School i Minneapolis i delstaten Minnesota.

Så blei fleire skot fyrte av gjennom glåsmaleria i kyrkja.

To born blei drepne. Dei blei åtte og ti år, ifølgje ordføraren i Minneapolis.

17 menneske er såra. 14 av dei er born. Dei tre andre er i 80-åra. Fleire får behandling på sjukehus, men alle er venta å overleve ifølgje politisjef Brian O’Hara i Minneapolis.

Motivet for skytinga er framleis ukjent, men politiet etterforskar ho som terror og hatkriminalitet mot katolikkar.

Tok sitt eige liv

Den mistenkte gjerningsmannen er identifisert til å vere 23 år gamle Robin Westman. Etter skytinga, tok han sitt eige liv bak kyrkja.

Ei årbok frå 2017 viser at gjerningspersonen er tidlegare elev ved Annunciation Catholic School, ifølge avisa Minneapolis Star Tribune.

Under skytinga skal han ha bore tre våpen: rifle, pistol og hagle. Politisjef O’Hara seier at han truleg brukte alle våpena. Westman skal ikkje ha hatt noko tidlegare valdshistorikk.

Inspirert av norsk masseskytar

Westman hadde ingen valdshistorikk, men publiserte ein video som viste fleire våpen og ammunisjon. Han hadde også skrive eit manifest og sjølvmordsbrev.

I videoen kjem det fram at han har late seg inspirere av gjerningsmenn bak tidlegare masseskytingar, også ein norsk.

På fleire av våpena skal det ha vore skrive namn, mellom anna «Breivik» med eit hjarte over. Anders Behring Breivik stod bak terrorangrepa i Oslo og på Utøya 22. juli 2011, der 77 menneske mista livet.

Det blir også vist til terrorangrepet i Christchurch på New Zealand i 2019, der 51 menneske blei drepne.

Gjerningspersonen hadde også skrive «drep Donald Trump» på eitt av våpena.

Videoen blei seinare fjerna av politiet.

– Forferdeleg valdshending

USAs president Donald Trump seier at han har blitt orientert om det han kallar ein tragisk skyteepisode.

– Det kvite hus fortset å overvake situasjonen. La oss be for alle dei involverte, skriv han på Truth Social.

USAs førstedame Melania Trump kjem med ein sjeldan uttale på X etter hendinga.

– Tragedien viser «behovet for førebyggande arbeid for å identifisere og stanse potensielle skuleskytarar», skriv ho.

Vidare ber ho om vaktsemd for truslar «heime, på skolane og på sosiale medium.»

– Å vere merksam på desse faresignala og handle raskt kan redde liv og gjere amerikanske lokalsamfunn tryggare.

Skulen husar born frå første til åttande klasse. Første skuledag etter ferien var på måndag.

Borgarmeisteren i Minneapolis omtaler skytinga som ein «ubeskriveleg handling». Bilete frå staden viser at familie og pårørande klemmer, græt og omfamnar borna sine etter hendinga.

– Eg ber for barna og lærarane våre, som har fått si første veke på skolen øydelagt av denne forferdelege valdshendinga, skriv guvernør Tim Walz på X.

Pave Leo i sorg

Pave Leo XIV som sjølv er amerikansk sørger over dei drepne og skadde.

I ei utsegn frå Vatikanet sender paven sine kondolansar to «dei som er råka av denne forferdelege tragedien, særleg dei familien som no sørgar over å ha mista eit barn».

Fleire skyteepisodar det siste døgnet

Hendinga er den siste av fleire skyteepisodar i Minneapolis det siste døgnet.

Tysdag ettermiddag blei éin person drepen og seks andre såra i ei skyting utanfor ein ungdomsskule, mens to personar døydde i to ulike skyteepisodar berre timar seinare.

– Eg er djupt påverka av denne hendinga og er lei meg på vegner av familiane som sørger, seier Minneapolis-ordførar Jacob Frey.

– Vonde handlingar som dette skal aldri skje. Men dei skjer altfor ofte, seier han.

Interessert i meir stoff frå utanriksredaksjonen? Høyr podkasten Urix her: