Europas mest ettersøkte mann sikta for fleire valds­oppdrag i Noreg

Svenske Ali Namdar er del av toppen i det kriminelle nettverket Foxtrot, som er leia av Rawa Majid, også kjent som «Den kurdiske reven».

21-åringen står på Europol si liste over dei mest ettersøkte personane i Europa. Han er sikta for nær 20 forhold i Sverige.

No går også Noreg ut med ei etterlysing.

Det etter at Namdar er sikta av Oslo politidistrikt for å ha stått bak og bestilt:

• Granatangrep ved Pilestredet i Oslo
• Skyteepisode i Sarpsborg
• Fridomskrenking på Rælingen i Akershus
• Skyting mot bustad på Høybråten i Oslo

Slik såg det ut etter granateksplosjonen i Oslo i haust:

I tillegg har Kripos sikta svensken for forsøk på forbund på drap eller alvorleg kroppsskade. Det kan bli aktuelt å utvide siktinga mot han til å også omhandle menneskehandel.

– Vi etterforskar med ei hypotese om at det kan dreie seg om menneskehandel, seier politiadvokat Anja Perminow Stenersen i Kripos til NRK.

– Vi har sett utstrekt bruk av barn og unge til slike valdsoppdrag, og det kan vere ei type utnytting til tvangstenester som blir råka av føresegna om menneskehandel, legg ho til.

Det har ikkje lukkast NRK å komme i kontakt med Namdars svenske advokat Thomas Håkansson, men overfor svenske medium har Håkansson sat at han ikkje ønsker å kommentere det 21-åringen er sikta for.

Siktinga til Kripos gjeld frå forhold for hausten og vinteren 2025. Dei har «sett aktivitet» også i 2026, og utelukkar ikkje at siktinga kan bli utvida.

Norsk politi samarbeider med Sverige om etterforskinga, og får støtte frå Eurojust og Europol i arbeidet.

Kripos har opplysingar om kor i utlandet Namdar skal vere, men vil ikkje kommentere noko utover dette.

Ni barn involverte

21-åringen skal ha ei sentral rolle i Foxtrot med å organisere valdsoppdrag, ifølge Oslo politidistrikt og Kripos.

– Vi meiner Namdar har hatt ei bakmannsrolle og at han er del av ei organisert kriminell gruppe, seier Henrik Rådal, politiadvokat i Oslo politidistrikt.

Ni ulike barn er involverte i sakene Namdar no er sikta for i Noreg. Dei skal ha blitt rekruttert til å gjennomføre kriminelle handlingar på oppdrag for Foxtrot.

– Politiet har brukt mykje ressursar på desse sakene. Ein viktig grunn til det er at vi ser veldig alvorleg på å bruke barn til straffbare handlingar. Det er ei utvikling som vi ikkje ønsker å ha i Noreg, seier Rådal.

Også Kripos er uroa over at det kriminelle nettverket får barn til å gjennomføre oppdrag.

– Vi ser at han har medverka til å legge ut valdsoppdrag, og det er fleire saker der vi veit at barn har tatt på seg desse, seier Stenersen.

Ho åtvarar barn og unge frå å ta på seg slike oppdrag, som lokkar med store pengesummar.

– Vi ser at dei ikkje får dei betalingane som er lova for oppdraget. Vi ser også at oppdragsgivar ikkje nødvendigvis har eit ønske om å beskytte barnet etter at oppdraget er utført, seier Stenersen.

Samarbeidde med nordmann

Namdar skal også ha samarbeida med ein norsk 20-åring med å rekruttere barn og unge.

Nordmannen, som var 19 år då hendingane fann stad, blei pågripen i Nederland i fjor haust.

Saman med svensken skal han ha hatt ei rolle som bakmann i fleire ulike straffesaker omhandlande valdsoppdrag i Noreg i fjor haust.

– Etterforskinga mot han er i ei avsluttande fase, vi forventar at saka vil vere ferdig etterforska før sommaren, seier Rådal.

Femsifra beløp for valdsoppdrag

Namdar skal stå bak liknande hendingar i Sverige.

Hausten 2025 skal ei 12 år gamal jente og ein 17 år gamal gut ha blitt rekruttert av Namdar til valdsoppdrag med handgranatar i Borås i Sverige, skriv SVT.

– Gjennom sosiale medium og krypterte chattar er det ikkje vanskeleg å rekruttere unge, seier politibetjent Joakim Hellström til kringkastaren.

Ungdommane mislykkast i å detonere granatane som var retta mot bustadhus kor fleire menneske var til stades.

Jenta skal ha blitt lova 80.000 svenske kroner, medan guten skulle få 40.000 svenske kroner for oppdraget.