Får Helseplattforma leve?

9 hours ago 2

– Det er så rart at Høgre og Arbeidarpartiet på liv og død skal sikre dette systemet, når dei som brukar det påpeiker at det ikkje fungerer.

Sylvi Listhaug (Frp) fryktar at det ikkje blir fleirtal for å skrote Helseplattforma, når politikarane på Stortinget skal stemme klokka 15:00 tysdag.

Ho er av dei som vil skrote heile greia.

– Dei er opptatt av å bevare og køyre på med dette vidare trass i at dette kostar mykje pengar, i staden for å seie at det ikkje er noko skam i å snu.

En kvinne med blondt hår og blå jakke blir intervjuet. Intervjueren er uskarpt i forgrunnen. Et kamera er synlig i høyre side av bildet. Bakgrunnen er lys og uklar. (Bildebeskrivelsen er laget av en KI-tjeneste)

Helseplattforma blei først tatt i bruk ved St. Olavs hospital i Trondheim i 2022.

Målet var å innføre eit nasjonalt journalsystem som skulle gjere det enklare for helsepersonell å få tilgang til opplysningar raskt.

Deretter blei det innført i Helse Møre og Romsdal, og er det til saman 34 kommunar i tillegg til helseføretaka som brukar det.

Alt du treng å vite om Helseplattforma

Regjeringa la fram ei stortingsmelding som tok utgangspunkt i utfordringar knytt til IT-løysingar i helsesektoren. Dei meinte at dei eksisterande løysingane gjorde det vanskeleg for dei ulike helseaktørane i landet å samarbeide med kvarandre. Målet var å utarbeide ein plattform som skulle gjere det enklare for helsepersonell å få tilgang til opplysningar raskt.
Styret i Helse Midt-Noreg sa ja til journalsystemet. Dermed vart Helseplattforma døypt, og Trøndelag skulle bere pilotprosjektet.
Trondheim kommune og St. Olav Hospital tok i bruk journalsystemet. Der blei det tidleg avdekt problem, blant anna ved informasjonsflyten.
Helseplattforma blei innført i Helse Møre og Romsdal, trass i at fleire var skeptiske til innføringa. Riksrevisjonen peikte på at innføringa hadde gått betre der enn i Trøndelag, på grunn av erfaringane dei hadde gjort seg på St. Olavs og i Trondheim kommune.
Riksrevisjonen gjennomførte ei undersøking av Helseplattforma. Dei konkluderte med at journalsystemet truga pasienttryggleiken og reduserte effektiviteten i pasientbehandlinga. Dei meinte også at det hadde blitt dyrare enn planlagt, og viste til at innføringa hadde kosta 6,7 milliardar, trass i at det skulle koste 4,1 milliardar. Riksrevisjonen anbefalte då Helse- og omsorgsdepartementet om å følge opp Helseplattforma og samarbeide med helseføretaka.
Etter rapporten frå Riksrevisjonen blei sleppt, bad Frp om å skrote journalsystemet og kaste styret i Helse Midt-Noreg.
Stortinget stemte over forlaget, og konkluderte med at dei ikkje ville undersøke om dei skulle skrote Helseplattforma. Samstundes vedtok dei at dei skulle starte ein gjennomgang.
No kom det på nytt eit forslag om å skrote journalsystemet, denne gongen frå Miljøpartiet dei grøne.
Forslaget til MDG var til høyring i Helse- og omsorgskomiteen, der fleire var både for og mot forslaget. Dersom det skal avviklast, peiker dei som er for på at det må bli gjort ei grundig utgreiing. Dei som er mot avvikling meiner at eit systemskift blir for krevjande.
Politikarane stemmer over MDG sitt forslag på Stortinget.

– «IT-svulst»

Bakgrunnen for voteringa er at Miljøpartiet dei grøne foreslo å skrote Helseplattforma i byrjinga av mars i år.

Då uttalte lege og stortingsrepresentant for MDG, Marius Langballe Dalin, at det var på tide å skjere bort «IT-svulsten», som han meinte var Helseplattforma.

– Det vil vere mykje enklare og mykje billigare å starte på nytt, viss vi ser det i eit lengre perspektiv, sa han under debatten i Stortinget tysdag.

Helse- og omsorgsminister Jan Christian Vestre (Ap) seier at det ikkje er tvil om at Helseplattforma er krevjande.

– Eg meiner at ein må sjå framover og ikkje gjenta gamle feil. Helseplattforma gir moglegheit for samhandling som ikkje finst i dei andre regionane i dag, og desse erfaringane meiner eg at vi må bruke for å utvikle samhandlinga.

Direktørane ved Helse Midt-Noreg og Helse Møre og Romsdal har også stilt seg kritiske til ei eventuell avvikling.

En mann med skjegg og dressjakke ser til siden. En annen person i mørke klær er delvis synlig i forgrunnen. Bakgrunnen er uskarp og viser et moderne interiør. (Bildebeskrivelsen er laget av en KI-tjeneste)

– Skapar støy

Ellen Visnes er tillitsvald for yngre legar ved barneavdelinga på Ålesund sjukehus, og følger spent med på voteringa.

– Men om vi har så store forhåpningar er eit anna spørsmål. Men vi håper vi blir tatt på alvor meg bekymringane vi har hatt over lengre tid.

Ho seier dei har gitt tilbakemeldingar på journalsystemet, men at det har skjedd lite dei to åra det har vore i bruk ved sjukehuset.

– Det har frå første dag vore utfordringar med brukarvennlegheit og pasienttryggleik.

Erlend Nakken er tillitsvald for yngre legar ved medisinavdelinga på Ålesund sjukehus, og deler oppfatninga med Visnes.

– Eg jobbar i eit akuttmottak med mykje støy, og med eit system som skapar endå meir støy så blir det slitsamt å jobbe med, og ein er aldri heilt sikker på at ein har gjort alt rett.

Publisert 26.05.2026, kl. 14.30

Read Entire Article