Fleire medium om FN-gransking: Ingen bevis frå Israel på at UNRWA-tilsette er kopla til terror

Slik konkluderer den etterlengta uavhengige rapporten, ifølge både Reuters og The Guardian.

Det heiter vidare, skriv dei, at UNRWA sine «problem knytte til nøytralitet» framleis er til stades, trass i organisasjonen sitt «robuste rammeverk».

Den fullstendige rapporten er varsla til klokka 18 måndag kveld.

Det var i januar at Israel hevda at 12 UNRWA-tilsette hadde koplingar til terrorgrupper, og hadde vore involvert i Hamas-angrepet 7. oktober.

Fleire enn 1100 menneske blei drepne. Som svar har også Israel invadert Gazastripa.

UNRWA-arbeidarane som fekk skuldingane mot seg i januar, fekk sparken umiddelbart. FN bestilte då denne eksterne granskinga av organisasjonen, og etterforska også internt.

Framleis nektar Israel å sleppe inn livreddande matleveransar til Gaza via UNRWA.

Generalsekretær i FN lovar «handlingsplan»

Colonna-komiteen kom med ein mellombels rapport sist månad, der dei viste til «kritiske område» der UNRWA måtte endre praksis. Kva område dette gjaldt, stod der ikkje.

No har generalsekretæren i FN, António Guterres, godkjent anbefalingane komiteen har kome med.

– UNRWA, med generalsekretæren si støtte, skal få på plass ein handlingsplan for å innføre dei anbefalte endringane, seier talspersonen hans i eit utsegn.

– På vegen vidare ber han alle aktørar om å aktivt støtte UNRWA, fordi det er ei livbøye for palestinske flyktningar i regionen.

Dei fleste har teke opp att pengestøtte

Ei rekke land valde å setje pengestøtta til FN-byrået på pause medan skuldingane blei etterforska.

Allereie i januar blei det meldt at UNRWA hadde mista 4,6 milliardar kroner i støtte.

Mange, som Sverige, Danmark og Australia, har starta opp att med støtta. Andre, som EU-kommisjonen, har utsett heile eller delar av si støtte.

Noreg stoppa aldri sine utbetalingar.

USA gir framleis ingen støtte til UNRWA, og vedtak om noko framtidig støtte har blitt blokkerte i Kongressen.