Fylkespolitikar under etterforsking for deling av Shada-bilete

Sør-Vest politidistrikt stadfestar til NRK at fylkespolitikar Bente Spissøy blir etterforska for brot på paragraf 267a i straffelova, og at ho har status som mistenkt.

Politiet i Møre og Romsdal opplyste i førre veke at dei har oppretta ei straffesak mot Rodgeir Vinsrygg etter mistanke om brot på den same paragrafen om deling av krenkande bilete.

Ifølgje skuldinga har Spissøy distribuert bilete av den unge jenta i den såkalla Shada-saka til andre medlemmer i Vestland fylkesting.

Andre folkevalde blei skaka

VG og Faktisk.no har dokumentert at påstandane om at 16 år gamle Shada blei tvinga til prostitusjon og drepen i barnevernet, ikkje har rot i verkelegheita.

NRK er kjent med at fleire av dei folkevalde reagerte sterkt på bileta dei fekk tilsendt.

– Eg kan stadfeste at både folkevalde og administrasjonen reagerte sterkt på bileta, seier fylkesordførar i Vestland, Jon Askeland (Sp).

– Eg blei skaka, seier Stian Jean Opedal Davies, som leier gruppa til Arbeidarpartiet.

Nils-Anders Nøttseter er gruppeleiar i MDG.

– Vi folkevalde får ein del underlege e-postar, også konspirasjonsteoriar. Men dei kjem normalt ikkje frå andre folkevalde, seier han.

Politiet oppretta sak på eige initiativ

Ettersom dokumenta var hemmelegstempla, blei juridisk avdeling i fylkesadministrasjonen kopla på, som i sin tur kontakta politiet.

Leiaren i avdelinga presiserer at dei ikkje melde forholdet, men at dei søkte råd om korleis dei skulle handtere situasjonen der ein representant brukte fylkeskommunen sin e-post til å sende ut potensielt ulovleg og sensitivt materiale.

Dialogen enda med at administrasjonen sende ut eit internt varsel om at ingen måtte dele bileta vidare, og at politiet på eige initiativ oppretta sak mot Spissøy.

Spissøy: – Eit alvorleg inngrep

NRK har snakka med Spissøy. Ho erkjenner at ho har delt bileta og at hensikta var å samle støtte for å opne ei mordetterforsking av det ho meiner er ei uoppklart sak.

– Det er òg viktig å presisera at det berre var gruppeleiarane som fekk den samla dokumentasjonen, seier ho.

– Dei andre fylkestingsrepresentantane skulle få sjølve fråsegna med fire vedlegg som eg vurderte som ukontroversielle.

Ho legg til at det ikkje er opp til «administrasjonen å avgjera kva informasjon dei folkevalde skal få tilgang til» og kallar saka «eit alvorleg inngrep i det frie politiske arbeidet til ein folkevald representant i Vestland og Noreg».

Gruppeleiaren i MDG svarer at «konspirasjonsteoriar tømmer samfunnsdebatten for luft».

– Eg er særs glad for at VG og Faktisk.no har gått i djupna i Shada-saka og fått avdekka dette miljøet, seier Nøttseter.

– Og eg er glad for at mediebransjen no evaluerer korleis dei bør arbeide betre med samfunnsoppdraget, både konspirasjonar og ekte utfordringar i barnevernet.