Ho blir NRK sin nye korrespondent i London

Solberg tek over for Gry Blekastad Almås, som har vore i London sidan 2021. Den nye korrespondenten skal vere på plass i London i august.

– Eg trur det blir veldig spennande å dekke Storbritannia nærmare. Eg har til no fokusert mykje på Midtausten og Asia, så det skal bli fint å flytte fokuset til Europa.

Lova seg sjølv å komme tilbake

Solberg er glad i Storbritannia frå før. I fire år studerte ho nemleg journalistikk og internasjonal politikk i både Sheffield og London.

Ho treivst så godt at ho vurderte å bli verande.

– Eg hadde likevel eit behov for å dra ut i verda. Men eg lova meg sjølv at eg ein dag skulle kome tilbake.

No, 20 år seinare, vert løftet innfridd.

– Eg gler meg spesielt til å dekke korleis høge levekostnadar pregar kvardag og politikk, og korleis Storbritannia navigerer sin plass i ei uroleg verd.

Erfaring frå Midtausten og Asia

Solberg har tidlegare vore korrespondent for NRK i Midtausten.

– Det er viktig i dag når verda heng så tett saman, seier utanriksredaktør i NRK, Sigurd Falkenberg Mikkelsen.

Mikkelsen fortel vidare at Solberg er ein svært god utanriksjournalist og ein god forteljar.

– Ho beherskar alle plattformer, skriv godt og veit kva som skal til for at journalistikken vår når fram til publikum.

Solberg tek med seg erfaringane frå då ho var korrespondent i Midtausten, men arbeidsforholda blir nok litt annleis.

– Det blir nok færre situasjonar der eg rapporterer med skotsikker vest og hjelm

Men ho trur likevel at mykje av arbeidet i London vil vere likt som før.

– Ein korrespondent skal formidle til eit norsk publikum korleis det er ute i verda. Og det er akkurat det same uansett kvar ein er.

Ho ser fram til å vere ute i felt igjen.

– Å vere ute, å følgje ei historie frå byrjing til slutt. Det gler eg meg mest til.