I dag gjer kreftsjuke Herrem comeback: – Ei maskin av eit menneske

– Ho har vist seg å vere ei maskin av eit menneske fysisk. Verkar som kroppen hennar er laga av betong. Den toler alt, seier tidlegare landslagskollega Silje Waade til NRK.

Klubbveninne Martha Barka er ikkje overraska.

– Det er jo litt sprøtt. Eg har sagt heilt sidan eg kjende dama at ho imponerer kvar gong. Kvar dag så er det noko nytt. Ho pushar grenser. Ho er beinhard, så eg blir imponert.

Det er to månadar sidan den folkekjære handballspelaren Camilla Herrem (38) fortalde omverda om at ho hadde fått brystkreft.

– For tre og ei halv veke sidan kjende eg ein kul i brystet. Kanskje på storleik med ei ert. Då tenkte eg at dette er noko eg bør sjekke ut, fortalde Herrem i ein video på Instagram.

Kort tid etterpå starta 38-åringen på sin første cellegiftkur. Tysdag denne veka hadde ho den siste kuren, som ho sjølv har omtalt som kraftig.

Sjølv om ho skal halde fram med ytterlegare behandling i 12 veker, er ho altså alt i dag, fem dagar seinare, truleg tilbake på parketten når ho er ein del av troppen til Sola når dei spelar mot Oppsal.

– Eg var først og fremst veldig sjokkert da den beskjeden kom. Ho var så supersprek og ung. Ei dame i sin beste alder som får den beskjeden...det unner eg ingen. Eg håpar verkeleg at det går bra med ho, fortel ein prega Waade.

Ho kryssar fingrane for at Herrem likevel kjem styrka ut av det.

– Eg har alltid visst at Camilla har vore heilt rå på bana, etter å ha spelt med ho både på landslag og i klubb, men ho er faen meg rå utanfor bane og. Den dame er laga av noko heilt spesielt.

Viktigaste at ho overlever

Tidlegare landslagskaptein og trenar for Runar, Bjarte Myrhol, fekk sjølv påvist testikkelkreft som aktiv i spelar i 2011.

– Heile handball-Noreg heiar på Camilla og på Steffen (trenar for Sola og ektemann), for det er tøft for han også oppi dette her. Sjølv om det er Camilla som skal ha sympatien, så veit eg kor tung det er å stå bak der også. Men dei to framstår som ein herleg kjernefamilie, så eg har ordentleg trua på at det skal gå bra.

Herrem har også tidlegare vist sin ekstreme fysiske kapasitet. 24 dagar etter fødsel av barn nummer to var ho tilbake på bana.

– For å vere heilt ærleg, det viktigaste for meg er at Camilla overlever. Eg bryr meg ikkje så mykje som handballen, så eg håpar ho har det bra. Inntrykket som ho syner i media er veldig positivt, og då blir ein glad.

38-åringen står bokført med 332 landskampar. 11 gull, tre sølv og tre bronse frå internasjonale meisterskap gjer ho til den nest mestvinnande handballspelaren i Noreg.

Etter EM-gullet mot Danmark fortalde Herrem at ho gav seg som landslagsspelar.

Open om diagnosen

Landslagstrenar Ole Gustav Gjekstad seier at Herrems kreftdiagnose har prega han.

– Det blir eit sjokk for alle og plutseleg blir ting veldig alvorlege. Det var ikkje det at ho skulle gi seg på landslaget som blei alvorleg. Det var faktisk ein livstruande sjukdom. Og så synst eg ho taklar det fantastisk. Ho spring rundt på kanten der, droppar den parykken og står på.

Herrem har heile vegen valt å vere open om den alvorlege diagnosen. På Instagram har ho delt bilete frå behandlinga ho har vore gjennom og kvardagen.

Herrem har heile vegen valt å vere open om den alvorlege diagnosen. På Instagram har ho delt bilete frå behandlinga ho har vore gjennom og kvardagen.

– Eg er ikkje overraska over at ho vel det. Ho er ein rollemodell og eit førebilete for mange, så eg håpar mange kan ta inspirasjon til korleis ho løyser det. Eg er djupt imponerande over det, seriar Myrhol som sjølv valte å vere open om sin diagnose i 2011.

Usedvanleg

Sara Hassing Johansen har doktorgrad frå Noregs idrettshøgskole, kor ho har undersøkt korleis kreftbehandling påverkar fysisk form og effekten av trening på kvinner som har gjennomført brystkreftbehandling. Ho let seg imponere av Herrems comeback-planar.

– Å vere tilbake på handballbane og eliteserien midt i cellegiftbehandlinga er usedvanleg. Her er det berre å ta seg av hatten. Samtidig er det viktig å understreke at dette ikkje er normalen, seier Johansen, som til dagleg jobbar er forskar ved medisinsk fakultet ved Universitetet i Oslo.

Cellegift er ei hard påkjenning for kroppen og opplevest individuelt fortel Johansen, som samtidig understrekar at det er ein fordel å vere godt trent.

– Forsking viser at pasientar som er i god fysisk form før behandling og er aktive under behandling, ofte toler behandlingane betre og opplever færre biverknadar. Ein annan viktig faktor er at toppidrettsutøvarar kjenner kroppen sin svært godt.

– Er det forsvarleg å vere tilbake så tidleg?

– Det vil avhenge av korleis ein responderer på behandlinga og av tett medisinsk oppfølging. Så lenge dette er ivaretatt, og ho sjølv kjenner kroppen sin så godt, så kan det vere forsvarleg for Camilla.

Johansen påpeikar at dette ikkje er for folk flest og at ein tilrår fysisk aktivitet tilpassa dagsform og eige utgangspunkt.

– Det kan vere alt frå ein roleg gåtur i sjukehuskorridoren til lett styrketrening. Det handlar om å halde kroppen i gang og unngå inaktivitet. Ikkje å prestere på eit elitenivå.

Forskinga syner at aktivitet og trening under behandling er svært fordelaktig og at det kan gjere at kjem raskare tilbake og opplever færre seinskadar.

– Eit behandlingsforløp er også ei psykisk påkjenning, og det kan vere verdifullt å finne sin eigen fristad, som for Camilla er handballen.

Oppsal tek i mot Sola i eliteserien i Oppsal Arena søndag klokka 15:10