Karen (79) tapte på nytt i retten - staten frifunnen for babyforbytting

Den ferske dommen frå Borgarting lagmannsrett slår fast at staten er frifunnen for brot på menneskerettar - og for kravet om erstatning.

Dette er samme konklusjon som Oslo tingrett kom fram til i fjor haust.

I dommen som blei avsagt fredag heiter det:

«Lagmannsretten finner ikke grunnlag for at staten som overordnet myndighet har brutt EMI artikkel 8 ved manglende eller utilstrkkelig innretning av fødselshjelp eller barselomsorg».

Retten har delt seg, og mindretalet konkluderer under tvil at menneskerettane er brotne.

Dei to kvinnene som gjekk til sak må dekkje eigne sakskostnader, men slepp å betale utgiftene som staten har hatt.

Blei forbytt på fødestova

I 1965 blei to babyar forbytt på fødestova i Herøy. Utan at mødrene forsto det, fekk dei med seg feil jente heim.

Først nesten 20 år seinare blei feilen oppdaga. Då bestemte styresmaktene seg for å legge lokk på saka. Dette har vore det vanskelegaste for kvinnene å akseptere.

For tre år sidan fekk ein av dei forbytte babyane, som var blitt vaksen, eit uventa treff på nettstaden My Heritage. Det førte til at saka for alvor kom fram i lyset.

Lang kamp i rettssystemet

Både den eine mora og begge dei to forbytte babyane gjekk til sak mot staten og kommunen for forbyttinga og for hemmeleghaldet seinare.

Dei meinte at styresmaktene hadde brote menneskerettane, og kravde millionerstatning.

Først tapte dei i Oslo tingrett hausten 2024. To av dei anka til Borgarting lagmannsrett.

No har dei tapt også der.