Kommunedirektør i Sogndal får 4,5 millionar i sluttpakke

Avtalen blir kalla «svindyr». No håpar saftbygda på ro etter den opprivande konflikten.

SAFTIG SUM: Kommunedirektør Tor-Einar Skinlo sikra seg etterlønn i 2,5 år. Foto: Hallgeir Vågenes / VG

• Anja A. T. Brekke
• Marie Dreyer Bakken

Oppdatert onsdag 5. november kl. 10:57

Kommunedirektør Tor-Einar Holvik Skinlo (42) i Sogndal er sikra ei sluttavtale på heile 4,5 millionar kroner etter tysdagens kommunestyre i Sogndal, skriv Sogn Avis.

Det betyr at han får etterlønn i 2,5 år, ifølgje Firda, som omtala avtalen først.

NOKO SKURRAR I IDYLLEN: Her i vakre Sogndal i det gamle trivselsfylket Sogn og Fjordane (no ein del av Vestland fyke) har konflikten gått føre seg. Foto: Hallgeir Vågenes / VG

Kommunen har vore prega av ein djup konflikt mellom ordførar Stig Ove Ølmheim (Ap) og kommunedirektør Skinlo i fleire år.

Ordføraren har mellom anna innrømt å ha avlytta og teke opptak av kommunedirektøren og andre politikarar i Sogndal.

Ville fortsette

Skinlos ønska først og fremst å fortsette som kommunedirektør, seier han via sin advokat Tor Erik Heggøy.

— Dessverre utvikla samspelet med delar av det politiske nivået seg slik at ei endring var nødvendig. Skinlo synest det er leit å måtte sei frå seg jobben, men han vil samtidig takke ordføraren for at han til slutt bidrog til denne løysinga, skriv Heggøy på vegner av Skinlo til VG.

Tor Erik Heggøy

Advokat

Advokaten skriv vidare at han meiner det ikkje fanst noko rettsleg grunnlag for å avslutte arbeidsforholdet.

— Vidare viser oppreisingserstatninga frå kommunestyret at dei erkjenner at han har vore utsett for ein urett. No som saka er over, er det ikkje føremålstenleg for meg å kommentere noko meir, skriv Heggøy.

VG har prøvd å få tak i ordførar Stig Ove Ølmheim, utan å få svar.

— Svindyrt

Då VG tok turen til bygda, fortalde dei om skjulte lydopptak, sladder og fryktkultur.

Konflikten har mellom anna ført til at varaordførar Gunnhild Bøyum (H) ikkje ville møte ordføraren åleine.

Sluttavtalen vart handsama i eit lukka kommunestyremøte der både NRK og Sogn Avis måtte vente i kjellaren under røystinga.

Debatten heldt på i heile fire timar.

KONFLIKT: Her er Stig Ove Ølmheim (Ap) og kommunedirektør Tor-Einar Skinlo i august. Foto: Hallgeir Vågenes / VG

Kommunestyrerepresentant Rita Navarsete frå Frp seier til Sogn Avis at ho helst ville sparka Skinlo på dagen og berre gi han tre månadar etterlønn.

— Me meiner framleis at framlegget vårt var det beste, at me vart nedstemte står me godt i. Men det blir svindyrt for oss, seier Navarsete.

Fleire seier til avisa at dei no håpar det blir ro i kommunen.

— Eg trur og håpar på ro, og at me kan jobba med politikk, og ikkje konfliktar framover, seier Laila Wigum (H) til avisa.