Mathias (15) frå Bodø vil bli fotballproff: – Veit at draumen er oppnåeleg

– Det var veldig morosamt å sjå kampen. Vi såg han saman med venner frå skolen. No veit vi at det er gode moglegheiter i ein liten by som Bodø, og ikkje berre i utlandet.

Det seier Mathias Setvik.

Han og Ariana Hong er 10.-klassingar ved Noregs Toppidrettsgymnas (NTG) i Bodø, og er mykje på fotballbanen utanfor Aspmyra.

Etter at det blei klart at Bodø/Glimt skal spele i Meisterligaen, har dei unge spelarane fått nytt giv.

– Det er ganske stort det Glimt har klart, seier Setvik.

Gutedraumen hans har alltid vore å komme seg på A-laget til Glimt.

– Og få vere med på denne historia. Bli med og skape historie for Glimt og Noreg.

Laget frå nord blei historiske då dei tok seg til Meisterligaen som det nordlegaste laget nokosinne. No skal dei spele mot lag som Borussia Dortmund, Atlético Madrid, Tottenham, Juventus, og Manchester City.

Ariana Hong seier at dette gir ho nytt håp om å bli proff fotballspelar.

– Det gir motivasjon til å trene for å komme så langt ein kan, seier Hong.

– Klarer ikkje ta det innover seg

Favorittspelaren til hennar er Patrick Berg.

Han har tidlegare uttalt til NRK at hans største gutedraum var å komme til Meisterligaen.

No har det skjedd.

– Personleg så betyr det veldig mykje. Det har vore ein fjern draum i mange år, også har han nærma seg år for år, og denne gongen kjente eg vi var klare for den utfordringa, seier Berg og legg til:

– Eg synest vi tar oss fortent inn i Meisterligaen. Det er surrealistisk å tenke på.

No er Bodø-klubben garantert 350 millionar kroner inn på bankkonto, og lag som Manchester City kjem på Aspmyra.

Det er stort for Berg at Glimt har kome så langt.

– Ein kjenner på det sånn emosjonelt sett. Det er nesten sånn at ein blir tom, for ein klarer ikkje å ta innover seg kva som faktisk har skjedd, seier han.

– Ingenting er umogleg

Reisa til Glimt viser at det knapt finst avgrensingar for fotballinteresserte gutar og jenter, seier forskar i idrettssosiologi ved Nord universitet, Mads Skauge.

– Sjølv i ein liten, einsam og forblåst by nord for polarsirkelen, kor det meste ligg til rette for at ein ikkje skal bli god i fotball. Det ikkje hatt så mykje å seie når det kjem til stykket. Ingenting er lenger umogleg.

Det meiner han er ei vanvitig drivkraft for ambisiøse fotballspelarar i 12–16 årsalderen.

– Det er då mykje av treningsgrunnlaget blir lagt. Det må vere ekstremt inspirerande. Eg er litt misunneleg på det å vere fotballungdom i Bodø no. For ei tid å vekse opp.

Ein driv gjerne med sport på grunn av førebileta sine, ifølge Skauge.

– Det er på same måte som ein kan begynne å spele gitar fordi ein blir fascinert av eit band, så er det nok mange som begynner å spele fotball fordi dei har blitt introduserte for spelet av foreldra ofte gjennom toppfotballkampar på TV og såkalla idol.

Desse idola har gjerne vore veldig eksklusive, som ein ikkje har kunna sjå i lokalsamfunnet, men berre gjennom TV og i utlandet. Det er no i ferd med å snu, ifølge forskaren.

– No gjer reisa til Glimt, og det at dei er i Meisterligaen, at du kan sjå veldig god fotball i eigen by. Det må vere ekstremt motiverande.

Ifølge forskaren blir ein også meir inspirert av det som er nært, enn det som er fjernt og abstrakt.

– Viss Patrick Berg kan kome til Meisterligaen, så kvifor kan ikkje eg klare det då? Om eg også bur i Bodø og er ti år. Det er ingen avgrensingar.