Meir ekstremvêr ventar – nytt verktøy skal styrke kommunane

Klimaendringane gjer at Nordland må førebu seg på meir og kraftigare uvêr i åra som kjem. No lanserer Statsforvaltaren KlimaROS, skriv dei i ei pressemelding.

Det er eit nytt tredelt verktøy som skal hjelpe kommunane med å forstå klimarisiko og styrke beredskapen.

– Hendingar kjem oftare, blir meir intense og råkar fleire samfunnsfunksjonar samtidig, seier Stina Marie Hov Andreassen i beredskapsseksjonen.

KlimaROS består av to dokument og eit kartverktøy, og gir kommunane oversikt over korleis klimaendringar påverkar naturfare, infrastruktur og kritiske tenester.

Verktøyet viser for eksempel korleis stormflo, skred og ekstremnedbør kan utvikle seg fram mot 2100.

Nordland er blant dei mest utsette fylka i landet, med sårbar infrastruktur og mange lokalsamfunn utan fast vegsamband.

– Målet er å gjere klimarisiko meir konkret, slik at kommunane står betre rusta når ekstremvêret kjem, seier Andreassen.