Nordlys i heile landet: – Magisk!

– Det dansa på himmelen. Eg har sett nordlys mange gonger, men denne gongen var det eitt av dei kraftigaste eg har opplevd, seier Christian Borge.

Han oppdaga nordlyset torsdag morgon då han var ute på luftetur med hunden på Osterøy, nord for Bergen.

Kraftig solstorm og ei rekke utbrot gav spektakulært nordlys over heile landet natt til torsdag og tidleg på morgonen.

– Det var heilt magisk. Eg var på nattevakt og fekk ein pause på 10 minutt utanfor. Eg følte eg stod i ein katedral. Det flamma over meg og det raude var veldig synleg, seier Marianne Ona Hansen, som tok bilete over Askøy.

Mange plassar gjekk glipp av nordlyset på grunn av skydekket.

Heilt sør til Italia

– Det har vore høg aktivitet, men den kom seinare enn venta. Først langt utpå natta fekk folk i heile landet sett kraftig nordlys, seier nordlysekspert Pål Brekke.

Han er fagsjef for romforsking ved Direktoratet for romverksemd. Han seier det er aktivitet fleire stader i verda no.

– Det er styrken på solstormen som avgjer kor kraftig nordlyset blir, men også kor langt sør nordlyset blir dytta. Aktiviteten dei siste par dagane, har trykka nordlyset langt ned i Europa. Det har vore nordlys heilt ned til Italia.

Passande nok kan det nemnast at det var italienaren Galileo Galilei som på 1600-talet gav nordlyset namnet aurora borealis.

Også i USA er nordlyset no synleg fleire stader.

– Sola er veldig aktiv, og me må nesten 20 år tilbake i tid for å finna tilsvarande aktivitet som me har hatt det siste året, seier Brekke.

Nye sjansar for nordlys i kveld

– Eg kan ikkje hugsa kor mange gonger eg har sett nordlyset i Bergen, men kvar gong er det heilt annleis. Det er noko med desse lysa som gjer at eg ikkje kan ta blikket frå dei, seier Barbara Pawlik, som opplevde nordlyset over Åsane i Bergen.

– Dagens nordlys var eitt av dei vakraste i år, men eg gler meg til meir.

Og det kan vera ho får nok ei magisk oppleving allereie i kveld igjen, ifølgje nordlysekspert Brekke.

– Noko av solstormen kan henga igjen i kveld. Nett no er det veldig høg aktivitet, men fordi det er dagtid, er det ikkje synleg. Men der det er natt, i USA til dømes, har dei no gleda av å sjå nordlys.

– Kvifor er me så fascinerte av nordlys?

– Det er ei fantastisk historie bak det, både mytisk og det at det var ein norsk forskar som var den første til å løysa gåta og forklara at det var sola som skapte nordlys. Det er også fascinerande at det som skaper nordlyset, ligg 150 millionar kilometer ut i rommet, og er synlege teikn på at det er ei kopling mellom sol og jord, seier Brekke.