Ny Volvo skal ha skote fart heilt av seg sjølv

– Pulsen er framleis høg, seier Jinett Sem-Johansen (66).

Tysdag parkerte ho utanfor tannlegekontoret i Lærdal, men innan ho var ute opplevde ho at bilen – ein Volvo C40 – tok saka i eigne hender, rykte til og skaut fart.

– Eg er berre glad for at det ikkje var folk der, seier ho.

– Det er Guds hell. Elles kunne dette gått rett ille.

– Alt skjedde før eg fekk sukk for meg

Flukta til bilen gjekk over parkeringsplassen og ein veg, og enda først då hjula på bilen blei hengande og dingle over eit øydelagt stakittgjerde.

Til Sogn Avis forsikrar sjåføren at ho aldri var nær gasspedalen.

– Alt skjedde før eg fekk sukk for meg. Eg hadde ikkje sjanse til å stoppe. Det var ein forferdeleg kjensle.

Pensjonisten, som var hjelpepleiar i sitt yrkesaktive liv, legg til:

– Det går bra no, men eg merkar at kroppen framleis er full av adrenalin.

Den same Volvo-modellen skal ha vore involvert i fleire liknande ulykker. Det finst mellom anna døme frå Drammen og Kolbotn.

Sjå kva Volvo svarer lengre ned.

NAF: – Vi har fått rapportar om liknande saker

I fjor akselererte same biltype gjennom veggen og fauk ut av fjerde etasje i eit parkeringshus ved Sandvika Storsenter. Ein mann døydde av skadane. Det er strid om kva som forårsaka dødsulukka.

Den same biltypen blei kalla tilbake og reparert for mogleg akselerasjonsfeil i 2022, og i dag verserer det eit søksmål i amerikansk rettsvesen om at modellen plutseleg kan finne på å «rykke til».

«Dette utgjer ein stor risiko for ulykker og skader for bilistar og fotgjengarar, spesielt i vanlege køyresituasjonar som parkering, samanfletting eller rørsle gjennom kryss», heiter det i søksmålet.

Saksøkarane gjer vidare eit poeng av at Polestar 2, som bruker same programvare som Volvo-modellen, har hatt liknande problem.

– Beskrivinga til føraren av kva som har skjedd har store likskapar med liknande saker som har blitt rapportert til oss, seier Ingunn Handagard, som er pressesjef i NAF.

– Heldigvis ser det ikkje ut til å ha ført til store skadar denne gongen.

– Avgjerande at føraren får svar

Det er i dag Statens vegvesen som undersøker bilar som har vore involverte i ulykker, på bestilling frå politiet.

I november i fjor blei det kjent at Vegvesenet ikkje hadde funne teikn til teknisk svikt på ulykkesbilen i Sandvika, der sjåføren omkom.

I rapporten konkluderte dei med at gasspedalen var aktivert omtrent tre sekund før kollisjonen.

I ulykker der det ikkje er omfattande skadar, er undersøkingane meir beskjedne.

– Det viktigaste spørsmålet for førarane er å få greie på om det faktisk er bilen som har handla sjølv, seier Handagard.

– Vi meiner det er avgjerande at føraren får svar, også i ulykker med mindre skadeomfang. Dei siste åra har det vore fleire hendingar av likande typar, og grundige undersøkingar er einaste vegen til å få oppklart kva som har skjedd.

Volvo: – Forstår at dette var ei skremmande oppleving

Henrik Juel Teige er pressekontakt i Volvo Cars Norge.

Han seier til NRK at han er kjent med hendinga i Lærdal «som involverer ein av bilane våre».

– Bilen står no på verkstaden hos forhandlaren, og vi skal undersøke han for å prøve å finne ut kva som har skjedd.

Han legg til:

– Forhandlaren vår er også i direkte dialog med kunden, og vi forstår at dette var ei skremmande oppleving for henne.