Omfattande hærverk på Lerkendal etter Europa-kamp

– Det var tagga på veggane og masse gris overalt, fortel Henrik Furuseth til NRK.

Torsdag kveld tok Rosenborg imot tyske Mainz til første oppgjer i playoff til Serieligaen.

Etter at dei rundt 1400 tyske supporterane hadde forlate stadionen skulle Furuseth, som jobbar for Dominos på Lerkendal, inn på lageret dei har i tribunen der tyskarane stod under kampen.

– Det var eit spesielt syn.

Adresseavisen og Nidaros har også omtalt hærverket.

– Og eg som synest svenskane var ille for to veker sidan, seier Furuseth og viser til da Rosenborg møtte svenske Hammarby i førre runde i kvalifiseringa.

Han fortel at han har jobba på Lerkendal sidan 2023, men at han ikkje har opplevd liknande tidlegare.

– Det er jo dårleg. Det er jo vaksne menn som driv på.

Torsdag morgon blei det klart at nokon hadde gjort hærverk med spelarbussen til dei tyske gjestane.

– Ikkje noko vi synest noko om

Dagleg leiar i Rosenborg, Tore Bjørseth Berdal, stadfestar fredag formiddag til NRK at det blei gjort hærverk.

– Det blei gjort eit ganske massivt hærverk på borteseksjonen, seier Berdal.

– Det er sjølvsagt ikkje noko vi synest noko om, men sånn blei det.

Berdal fortel at det er laga sjølv som har ansvar for eigne supportarar når dei reiser på tur i Europa.

– No må vi sette i stand tribunen igjen og det er ein rekning som går til Mainz, seier Berdal.

Han fortel Rosenborg har eit godt samarbeid med både Uefa og den tyske klubben.

Mainz har ikkje svart på NRK sine førespurnadar fredag formiddag.

– Vanvettig imponerande

Mainz var favorittar i forkant av kampen som er den første i dobbeltoppgjeret.

Likevel vann Rosenborg 2-1 etter ein sein scoring av Ole Sæter.

– Det er disse kveldane ein jobbar for, seier Berdal.

– No har vi sett oss i ein god posisjon før vi skal til Tyskland neste veke.

– Det er vanvettig imponerande av Rosenborg, sa NRKs fotballekspert Johannes Børstad etter kampen.

Mainz kom på sjetteplass i den tyske Bundesligaen sist sesong.

– Ein møter eit lag frå ein av dei beste ligaene i verda, men det Rosenborg presterte i dag var vanvettig imponerande, sa Børstad.

– Dei skapte flest moglegheiter, dei hadde mest ball og til slutt scora dei også to fortente mål.

Med 2-1 siger har Rosenborg eit godt utgangspunkt før returoppgjeret som blir spelt i Tyskland neste torsdag.