Over 200 elevar bortførte frå katolsk skule i Nigeria

Også tolv lærarar skal ha vorte bortførte, i tillegg til 215 skuleelevar, seier ein talsperson for Christian Association of Nigeria (CAN).

– Eg har nettopp komme tilbake frå eit besøk på skolen. Der møtte eg foreldra til barna for å få forsikre dei om at vi samarbeider med myndigheitene og sikkerheitsorgana for å sørgje for at barna blir redda og bringa trygt tilbake, seier talsperson Daniel Atori til nyheitsbyrået AP fredag kveld.

CAN er ein paraplyorganisasjon for ei rekkje kristne kyrkjesamfunn i Nigeria.

Tidlegare på dagen melde den lokale TV-stasjonen Arise at 52 skulebarn var bortførte.

Saknar fire barnebarn

Angrepet var retta mot St. Marys skule i byen Agwara i delstaten Niger. Delstatsmyndigheitene har ikkje oppgitt talet på elevar eller lærarar som er bortførte, eller kven dei mistenker for å stå bak.

– Det eksakte talet på elevar er enno ikkje bekrefta, sa Abubakar Usman i delstatsregjeringa i ei fråsegn tidlegare fredag.

Ifølgje myndigheitene er skulen ein ungdomsskule, noko som betyr at dei er mellom 12 og 17 år. Satellittbilde viser likevel at skuleområdet er knytt til ein nærliggande barneskule, med meir enn 50 klasserom og sovesalar.

AP har snakka med ein bestefar som seier at fire av barnebarna hans, i alderen sju til ti år, var blant skulebarna som vart bortførte.

– Vi veit ikkje kva som skjer no, for vi har ikkje høyrt noko sidan i dag tidleg, seier bestefaren.

Løysepengar

Hendinga skjer få dagar etter at 25 jenter blei bortførte frå ein kostskule i delstaten Kebbi, nordvest i Nigeria.

Fredag kom det også meldingar om at 38 medlemmer av ei kyrkje er bortført i delstaten Kwara. Ein representant for kyrkja seier til Reuters at væpna menn kom og bortførte dei 38, og at dei krev cirka 69.000 dollar per person før offera blir frigjorde.

Bortføringar har blitt vanleg i delar av det nordlege Nigeria, der titals væpna grupper utnyttar den svake sikkerheita til å gå til angrep i landsbyar og langs hovudvegar.

Dei fleste offera blir sette fri først når det er betalt løysepengar. Krava kan vere på fleire tusen dollar.

I 15 år har militante islamistiske og jihadistiske opprørarar herja i regionen, blant dei Boko Haram.