Rune mista kona Anita (52) – nå jobbar han for tryggare vegar

52 år gamle Anita Øvrebø Pettersen var på veg til jobb ein tidleg morgon i mars i fjor.

Like nord for Vikatunnelen i Namsos kom ein semitrailer og kolliderte med bilen hennar på det glatte føret. Livet hennar enda der.

Ektemann Rune Pettersen følgde rettssaka mot ein yrkessjåfør førre veke.

– Ei sånn dame fortener å få eit ansikt utetter.

Han valde sjølv å sette seg i vitneboksen under rettssaka.

Ville seie korleis ho var

Anita blei eit nytt trafikkoffer. Ho er ei av mange som mista livet på norske vegar i fjor.

Han fortalde i retten korleis ho var som menneske. Han meiner det var viktig å få fram. Det er ikkje berre eit namn.

– Ikkje minst alle ho tok til seg. Ho har fire barn sjølv, stebarn, stebarnebarn og kjempestor familie. Alle ho møtte likte ho.

Blei med i Trygg Trafikk

Kvart år er det fakkeltog og minnemarkering for dei som har mista livet i trafikken, slik det blir no i januar. Også Rune Pettersen bar ein fakkel i Verdal tidlegare i år.

Etter ulykka har han blitt med i Trygg Trafikk, og han håpar å gjere ein forskjell.

– Det har på ein måte blitt veldig fint i ein sorgprosess.

Han deler med andre kva han sjølv har opplevd, og seier førebygging med russen er veldig, veldig viktig.

Også i år er det for mange omkomne i trafikken, seier han.

Son skreiv song

Sonen til Rune, Joakim Pettersen laga songen «Vegen til tryggleiken», etter at Anita mista livet.

Songen er gitt ut i samarbeid med blant anna Trygg Trafikk.

– Eg bruker å seie det at du bør ta vegen til tryggleiken, når du ferdast i trafikken, seier Rune Pettersen.

Sørgeleg høgt

Utviklinga i talet på drepne i trafikken i år er berre tragisk, seier regionleiar Frode Tiller Skjervø i Trygg Trafikk. I fjor mista 87 menneske livet, mens det så langt i år er 103 drepne.

– Vi hadde ei positiv utvikling på talet på drepne i fjor og året før der, og så er vi tilbake igjen over 100 drepne. Det er sørgeleg høgt.

For Trygg Trafikk betyr det mykje at pårørande engasjerer seg, som Rune har gjort.

– Det er ei veldig tragisk oppleving dei står i, og har stått i. Men at dei då vil dele korleis det faktisk er å miste nokon, har ein veldig bra førebyggande effekt, seier han.

Då verda rasa

15. desember kom dommen.

Ein yrkessjåfør blei dømd til fengsel i fire månader, og tapte førarretten i tre år.

Tida etter ulykka har vore tung for Rune.

– Dei siste orda eg sa til ho, var om kvelden då vi la oss. Dagen etter er ho faktisk borte. Verda rasar.

Han seier han har vore heldig som har hatt veldig gode folk rundt seg i tida etterpå.