Sindre Tjelmeland blir ny hovudtrenar for MFK

Sindre Tjelmeland skal ha takka ja til å bli den nye hovudtrenaren til MFK. Det stadfestar klubben i ei pressemelding søndag ettermiddag.

Den siste tida skal Tjelmeland og MFK ha vore i samtaler om trenarjobben, som endeleg er landa.

Tjelmeland er for tida assistenttrenar for det polske laget Lech Poznan, og vil ta over i Molde seinast mai 2026, når den polske sesongen er over.

– Først og fremst er eg stolt av å kunne seie at eg skal bli hovudtrenar i Molde. Molde er det ein av dei mest attraktive klubbane i Skandinavia, og eg gler meg verkeleg til å kome i gang, seier han ifølge pressemeldinga.

Avtalen gjeld for tre år, med moglegheit for ytterlegare eit år.

Tjelmeland er frå Etne utanfor Haugesund, og har tidlegare jobba for blant anna Åsane, Ull/Kisa, Start og IFK Göteborg.

Tar over midlertidig

Molde har i tillegg tilsett Martin Falk (30) som førstelagstrenar. Han vil fungere som midlertidlig trenar fram til Tjelmeland tar over.

Svenske Falk har erfaring som assistenttrenar i AIF og Malmö FF.

Trenarteamet vil dessutan bestå av Mario Chavez, Per Magne Midsund, og Daniel Berg Hestad.

Hoseth går ut

Mange har spekulert i kven som skulle ta over trenarjobben i Molde og fleire supportarar peika på Magne Hoseth som hovudtrenar.

Han er eigentleg assistenttrenar for MFK, men har fungert som hovudtrenar dei siste månadene.

I pressemeldinga skriv klubben at Hoseth no har valt å gå ut av trenarteamet, men det er ikkje avklart kva han skal gjere. Dei diskuterer roller og moglegheiter i klubben.

Klubben har stått utan hovudtrenar sidan september, då Per-Mathias Høgmo slutta i MFK. Sesongen var prega av svært dårlege resultat.

Molde har kalla inn til pressekonferanse kl. 18.30. NRK vil vere til stades.