Skal kåre Årets Nordlending i 2025 – juryen treng di hjelp

Avisa Nordland og NRK Nordland skal enda ein gong dele ut heidersprisen Årets Nordlending i år.

Prisen går til nokon som har gjort noko ekstraordinært i løpet av året som har gått.

Og tradisjonen tru blir nå folket invitert til å bidra i prosessen for å finne gode kandidatar.

Årets jury består av distriktsredaktør Vibeke Madsen i NRK Nordland, sjefredaktør Stig Jakobsen i Avisa Nordland, Arktisk Filharmoni-direktør Trud Berg og Jim Simonsen Jenssen, fylkestingsrepresentant og leiar i næringskomiteen på fylket.

– Det skjer utruleg mykje positivt og bra i fylket vårt, og vi er heilt avhengige av innspel med grunngivingar for å finne dei beste kandidatane til prisen, seier Vibeke Madsen i NRK.

• Trykk her for å sende inn ditt forslag

– Sette avtrykk

Avisa Nordland starta med kåringa i 2002, og i 2009 kom NRK Nordland med på laget.

Da fjorårsvinnaren skulle kårast kom det inn over 8000 stemmer. Dei fleste av desse gjekk til Tor-Håkon Gabriel Håvardsen, som blei kåra til vinnar.

– Det å vere assosiert med alle dei som har vunne denne prisen tidlegare er jo heilt ufatteleg. Eg hadde ikkje trudd at eg skulle vinne i det heile, sa ein overraska Håvardsen.

Fristen for å nominere denne gongen er 17. november kl. 23.59.59.

– Vi ser etter nokon som har sett avtrykket sitt på 2025, og som har definert året. Det kan vere nokon innanfor sport, kultur, næringsliv, frivilligheit eller nyheitsbildet elles. Det kan også vere nokon som har gjort noko spesielt for å hjelpe andre, seier Stig Jakobsen, sjefredaktør i Avisa Nordland.

Gler seg

Statuttane til prisen lyder slik:

«Årets Nordlending i år har gjennom personleg innsats det siste året bidratt til trivsel og utvikling for nordlendingane og/eller stått fram som eksempel på skaparkrafta til nordlendingane og stå-på-vilje.

Årets Nordlending i år blir kåra av ein jury sett ned av NRK Nordland og Avisa Nordland, etter ei brei høyring blant befolkninga i Nordland.»

Når den endelege kandidatlista er klar vil publikum få høve til å gi stemmene sine. Kandidatane skal også presenterast kvar for seg i Avisa Nordland og NRK Nordland.

Vesterålingen Jim Simonsen Jensen, leiar av næringskomiteen på fylkestinget, er fersk jurymedlem. Han gler seg til å sjå alle forslaga som kjem inn.

– Det er ei spennande oppgåve. Eg forventar eit stort engasjement, for dette er noko eg erfarer det blir snakka om på lunsjbord i heile fylket, seier Simonsen

Forslag kan sendast inn både på Avisa Nordlands og NRK Nordlands nettsider.

Årets Nordlending i år 2025 blir kåra like før jul.