14 hours ago
4
Om du vil kjøpe ein siste boks med Sunda eller Nøtte før pålegga går over i historia, kan du vere for seint ute.
Publisert 17.09.2025 14:14
For eit par veker sidan blei det kjent at produksjonen av pålegga Nøtte og Sunda skulle bli avvikla. Årsaka var lite sal og at produksjonsutstyret var utdatert.
«Det gylne pålegget» Sunda blei lansert i 1930, og var eit av dei første søtpålegga som blei selt i Noreg. Nøtte kom på marknaden i 1965.
– Vemodig
Om du er ein av dei som likte Nøtte og Sunda, har du dårleg tid på deg om du vil kjøpe pålegga.
– Vi er i praksis tomme for Sunda og Nøtte på vårt lager, seier Kristoffer Barbøl Vikebak, kommunikasjonssjef i Orkla Foods Norge, til TV 2 onsdag.
Han har ikkje oversikt over kva butikkane har på lager.
– Dette er produkt mange har eit nostalgisk forhold til, og både vi og forbrukarane synest det er vemodig at Sunda og Nøtte går over i historiebøkene, seier Vikebak.
Også NRK og Nationen har skrive om saka.
Til NRK seier Vikebak at pålegga har «blitt offer for Nugattis suksess».
– Maskinene til Sunda og Nøtte er veldig gamle. Den dagen vi produserte siste køyring med Sunda, var det så vidt vi fekk maskina i gang. Så dei er modne for utskiftning, men det er ei større investering enn dei låge salstala kan forsvare, seier Vikebak til NRK.
Snart tomt
Fleire butikkjedar opplyser også om at det byrjar å bli tomt i hyllene. Riktignok har ikkje alle hatt pålegga i sine sortiment. Kiwi har ikkje selt Nøtte og Sunda dei siste åra, mens Rema berre har Sunda.
Onsdag er det framleis nokre Rema-butikkar som har Sunda på lager.
Coop hadde berre 14 pakkar igjen med Sunda på måndag, då dei tok ein sjekk. Nøtte hadde dei 521 pakkar igjen av.
– Lageret vårt er tomt og på måndag var det berre 125 butikker som hadde eit eller begge produkta i hyllene, seier kommunikasjonsrådgivar Kristin Estil Jacobsen.
På Finn.no har det dukka opp fleire boksar med Sunda og Nøtte til sals, men til ein langt høgare pris enn i butikken. Prisane varierer mellom 150 og 400 kroner.
English (US) ·