Tingretten seier ja til sjødeponi inntil vidare

Måndag ettermiddag fekk rettsdramaet om Førdefjorden enda ei akt da Sogn og Fjordane tingrett slo fast at gruveselskapet får halde fram som før inntil fjordsøksmålet blir rettskraftig.

Borgarting lagmannsrett konkluderte i august med at løyvet til å tømme gruveavfall i fjorden er ugyldig.

Men dommen er ikkje rettskraftig før Høgsterett seier sitt – antakeleg neste år.

Rettsavgjerda i dag svarer på kva som skal skje i mellomtida: pause i gruveverksemda eller «business as usual».

– Bryt med den allmenne rettskjensla

I retten argumenterte Naturvernforbundet og Natur og Ungdom for at framleis aktivitet bryt med den allmenne rettskjensla.

For å gå gjennomslag for sitt syn måtte dei overtyde retten om to forhold:

• At framleis aktivitet vil gjere vesentleg og uboteleg skade på fjorden.
• At Høgsterett sannsynlegvis vil ta deira parti og konkludere på same måte som Borgarting lagmannsrett.

Til dette innvende gruveselskapet at dei har utsleppsløyve så lenge saka verserer i rettsapparatet, og at det einaste dei skuldar omgivnadene er å fortsette å drive med si 100 prosent lovlege verksemd.

Vidare gjorde dei eit poeng av at saksøkarane rettar bakar for smed:

Om saksøkarane har noko usagt, så må dei ta det opp med dei som har gitt løyvet (staten), og ikkje dei som har fått løyvet (gruveselskapet).

– Grundige vedtak ligg til grunn for valet om sjødeponi

Sjølv om det var gruveselskapet som måtte svare for seg, var staten representert ved regjeringsadvokaten.

– Vi er med for å gi retten eit godt grunnlag gjennom at vi gjer greie for dei grundige vedtaka som ligg til grunn for valet om sjødeponi, forklarte regjeringsadvokaten da saka gjekk for retten i oktober.

Fordi avgjersla blir rekna som børssensitiv, blei han kunngjord først etter stengetid på børsen, klokka 16.30.

Dagens utfall er ikkje siste ord om sjødeponiet i Førdefjorden.

Rettsavgjerda frå Sogn og Fjordane tingrett kan bli anka, og siste ord er det til sjuande og sist Høgsterett som har.

Enten ved at dei seier nei til å ta saka. Eller ved at dei seier ja, og det blir ein ny juridisk omkamp neste år.

Regjeringa: – Behovet for rutil har blitt enda viktigare

Vidare er det ikkje gitt korleis jussen blir omsett i politisk handling.

Om Høgsterett konkluderer på same måte som Borgarting lagmannsrett, er det ifølge ekspertar på forvaltningsrett mogleg å tenke seg at regjeringa gir eit nytt løyve – på eit nytt grunnlag.

Ifølge kritikarar begynte regjeringa å førebu denne manøveren allereie i mai da dei lista opp fleire grunnar til å seie ja til sjødeponi i ein kongeleg resolusjon.

– Med dagens sikkerheitspolitiske situasjon er behovet for slike mineral (rutil, journ.anm.) blitt enda viktigare. Det understrekar vi no, forklarte klima- og miljøminister Andreas Bjelland Eriksen.

Næringsminister Cecilie Myrseth gjentok same bodskap i oktober:

– Dette prosjektet sikrar tilgang på eit kritisk og strategisk viktig mineral, som blir brukt både i forsvarsindustrien og flyindustrien. Ein stans i produksjon kan i verste fall leie til konkurs.