Trump: – Ikkje interessert i å snakke med Musk

Dermed ser det ikkje ut til å gå mot ei rask forsoning etter den offentlege ordkrigen som starta torsdag ettermiddag, mellom den mektigaste og den rikaste mannen i verda.

Nettstaden Politico melde fredag morgon at Trump og Musk skulle snakke på telefon i løpet av dagen. Det ser det altså ikkje ut til å bli noko av.

Til ABC News seier Trump at han ikkje er «spesielt interessert» i å snakke med Musk.

– Du meiner mannen det har tørna for, sa presidenten i eit telefonintervju med kanalen.

Harde ord

Trump hevda torsdag at Musk «went crazy» – «blei galen» på norsk – og at han bad Musk om å gå av.

Presidenten kritiserte Musk for kritikken hans av Trump sin nye budsjettplan. Musk hadde omtalt planen som «motbydeleg».

«Elon og eg hadde eit flott forhold. Eg veit ikkje om det kjem til å halde fram. Eg blei overraska», sa Trump til journalistar torsdag.

Trua med å kutte kontraktar

På Truth Social trua Trump også med å kutte Musk sine kontraktar med den amerikanske staten, og at det er «den lettaste måten å spare pengar på».

Dei to største selskapa Musk har, er elbilprodusenten Tesla og romfartsselskapet SpaceX.

Musk reagerte med å varsle at SpaceX straks skulle begynne prosessen med å ta romfartøyet Dragon ut av drift, som følgje av det president Donald Trump hadde sagt.

Men natt til fredag ombestemte han seg.

Dragon blir blant anna brukt til transport til Den internasjonale romstasjonen (ISS).

Sentral rolle

Mangemilliardæren Elon Musk blei henta inn av Donald Trump for å kutte i staten sine utgifter.

Planen var å jakte på og få bukt med det Trump omtalte som sløsing, bedrageri og misbruk.

Demokratar og kritikarar kalla Musk «Trump sin medpresident».

30. mai slutta Musk i jobben. Det var heile tida planen at han skulle ha denne jobben i 130 dagar.