USA gir milliardar i omstridd våpenstøtte til Ukraina

Laurdag stemte Representantanes hus i den amerikanske Kongressen for å gje enorme beløp i støtte til Ukraina, Israel og Taiwan.

Til saman er pakkane på 95 milliardar dollar. Det er nesten tolv gonger meir enn Noregs forsvarsbudsjett.

61 av milliardane er til krigen i Ukraina.

Etter avstemminga jubla fleire av representantane i kongressen. President Joe Biden har jobba for å få støttepakken godkjent.

– Eit svar på historias kall, uttalte han etter avstemminga.

Pakken blir no sendt til Senatet, der Demokratane har fleirtal. Det venta at dei gjer grønt lys til støttepakken allereie neste veke.

– Takknemleg

Støttepakka vil føre til fleire drepe ukrainarar, uttalte russiske myndigheiter etter vedtaket i kongressen, skriv Reuters.

–– Det vil berike USA meir og øydelegge Ukraina ytterlegare, ved å drepe fleire ukrainarar på grunn av regimet i Kyiv, seier president Vladimir Putins talsperson Dmitrij Peskov til det statlege russiske nyheitsbyrået Tass.

Ukrainas president, Volodymyr Zelenskyj, har trygla omverda om meir våpenstøtte.

– Eg er takknemleg overfor Representantanes hus, begge parti, og speaker Mike Johnson personleg, for avgjerda som gjør at historia er på rett spor, skriv presidenten i ei melding lagt ut på X/Twitter.

–Takk, USA, avslutta han meldinga med.

Nato-sjef Jens Stoltenberg har jobba for at USA skulle gje pengar til Ukraina.

– Ukraina bruker våpena som dei Nato-allierte gjer landet til å øydeleggje den russiske kampevna. Dette gjer oss alle tryggare, både i Europa og Nord-Amerika, skriv Stoltenberg på X/Twitter.

– Fantastisk

Eit trettitalas ukrainarar og andre som har kjempa for den amerikanske støtta, jubla utanfor kongressbygningen då resultatet var klart.

Ein av dei var Ella Milishevich.

– Det kjennast fantastisk. Vi har venta i seks månader på dette. Det er så viktig at det ikkje er til å tru. Soldatane ved fronten har mangla alt, seier ho til NRK.

Rundt ho ropte folk «USA, USA» og «Thank you, America».

– Vi er verkeleg takknemleg og håpefull om at dette kan føre mot ein slutt på krigen. Eg har venar og familie som slost og bur der, og familie som har flykta, seier Milishevich.

Vil fjerne sin eigen

Inne i kongressen har republikanske house speaker Mike Johnson vore avhengig av demokratisk støtte for å få gjennom forslaga.

– Det einaste som held terroristar og tyrannar i sjakk er bildet av eit sterkt Amerika, og det at vi står sterkt saman, sa Johnson før avstemminga.

Ukraina-støtte er omstridd i delar av Det republikanske partiet. Representantar la derfor fram eit mistillitsforslag mot Johnson.

– Vi vil heller sende kuler til Ukraina enn våre eigne gutar, sa Johnson.

– Eg er ikkje bekymra for forslaget om å fjerne meg, la han til.

Har teke tid

USA har vore ein viktig støttespelar for Ukraina. Men støttepakken har teke tid å få godkjent.

Det var Republikanarane som sat på bakbeina og ikkje ville gi meir støtte til det krigsherja landet.

Eit uvanleg samarbeid mellom demokratar og republikanarar sikra våpenstøttepakken til Ukraina.

– Svært gledelege nyheiter

Utanriksminister Espen Barth Eide (Ap) seier at støtta frå USA er avgjerande for å snu trenden, der Russland har hatt framgang.

– Dette er svært gledelege nyheiter. Denne støtta er nødvendig og vil blant anna bidra til å gi Ukraina betre luftverndekning, uttalar utanriksministeren i ein e-post.

Venstre-leiar Guri Melby meiner at Noreg bør følge på og gje meir støtte.

– Ukrainarane sin fridomskamp er for vår alles felles fred og tryggleik, og Ukraina er heilt avhengig av all støtte dei kan få i kampen mot Putins blodige angrepskamp, seier ho til NTB.