Norsk forsking klar for å endre MS-behandling verda over

– Utan dette er det ikkje sikkert eg kunne ha vore her no. Kanskje kunne eg ikkje ha tatt vare på familien min.

Det har gått fire år sidan Hanne Sørheim kjente prikking i høgrebeinet. Nummenheit. Det spreidde seg til andre delar av kroppen.

Til slutt kom diagnosen, multippel sklerose.

Det betydde ei usikker framtid for småbarnsmora.

– Det var rett og slett eit sjokk. Eg var ikkje veldig positiv til framtida då.

Men over kaffikoppen på ein kafe i Bergen fortel ho at livet er om lag som tidlegare.

Sørheim vart med på eit forskingsprosjekt på Haukeland universitetssjukehus. Det gjorde at ho kunne få ein ny medisin med ein gong.

Stadfesta og publisert

Tidlegare ville ein effektiv medisin tilsvarande det Sørheim har fått kosta kring 300.000 kroner årleg.

NRK har følgt forskinga i prosjektet «Overlord» dei siste åra.

No er det dokumentert at ein langt billigare medisin har same effekt.

Resultata er publisert i det anerkjende forskingstidsskriftet New England Journal of Medicine .

– Kort sagt har vi vist at medikamentet rituksimab har like god effekt som dei mest effektive godkjende MS-behandlingane, seier forskingsleiar Øivind Torkildsen.

Prisen er kring 5000 kroner årleg for ein pasient. Berre 2 prosent av kostnadene for legemiddelet det i dag er vanleg å bruke verda over.

– Vi trur dette kan få store konsekvensar verda over. Fleire kan få medisin, og dei kan få det tidlegare. Særleg i fattige land vil det vere viktig, meiner professoren.

Fryktar for politikken

Sjølv om dei gode resultata no er stadfesta er Torkildsen usikker på korleis dei kan få endra MS-behandlinga verda over.

Han ventar motstand frå dei som produserer dagens MS-medisin.

– Vi er jo spente på kva som skjer no. Eg vil tru det er motstand mot ein såpass billig «off-label» behandling.

Torkildsen vonar å få støtte frå Direktoratet for medisinske produkt (Dmp). Dei har allereie opna for at medisinen kan brukast i Noreg.

Men det er ikkje eit formelt europeisk marknadsføringsløyve for legemiddelet til MS-behandling.

Overlege Ingrid Wang i DMP skriv det er legemiddelfirmaet som må søke til det europeiske legemiddelbyrået for at rituksimab skal få vidare spreiing.

Torkildsen seier dei førebels ikkje har kunne ha dialog med produsenten sidan forskinga skal vere uavhengig.

Men for Hanne Sørheim, og mange andre norske MS-pasientar har forskinga i Bergen allereie betydd mykje.

– Sjukdomen har stått stille. Ingen nye symptom. Det er forferdeleg å tenke på korleis eg kunne ha hatt det utan denne medisinen.