Betongvegg i gjødselkjellar kollapsa – store mengder kumøk har runne ned på europaveg

Ein betongvegg på ein gjødselkjellar i Sunnfjord kollapsa onsdag morgon. Gjødselkjellaren ligg mellom Langhaugane og Morskog.

– Det me veit så langt er at møk skal ha runne ned på E39, fortel vaktkommandør Helge Lund ved 110 Vest til NRK rett etter 07.30.

Førebels har brannvesenet fått opplyst at 1500 liter skal ha runne ut.

Dette skal ha skapt problem for trafikken på staden.

Bjørn Inge Solheim, som har køyrt igjennom området, meiner det er langt meir enn 1.500 liter.

– Det låg og flaut i vegen i omlag 400-500 meter, og grøftene var fulle, seier han til NRK.

Han starta å kjenna lukta lenge før han kom til området.

– Det auka på då eg nærma meg, seier han til NRK.

Fleire andre har også rapportert om sterk lukt i området.

Solheim er han uroa for om bilen vil tola å stå til han er ferdig på jobb, eller om han må få spylt den.

– Akkurat no er eg på veg til jobb, så eg har ikkje tid til å få vaska bilen, seier Solheim.

Klokka 08.05 er brannvesenet i gang med å spyla vegbanen, ifølgje NRK-fotograf Torje Bjellaas.