Håper på endeleg punktum i Frosta-saka: – Det har hengt over mange i lang tid

– Eg trur folk er veldig klare for å bli ferdige med saka. Det har hengt over mange i lang tid. Så at det blir sett eit punktum no, trur eg berre er godt for folk.

Det seier Torbjørn Fredagsvik. NRK møter han utanfor butikken i Frosta sentrum.

– Det er ei sak som omhandlar veldig mange, og så har det føregått veldig lenge. Folk er nok prega på mange måtar, og blir jo minte på det kvar dag.

– Folk skjemmest kanskje litt for å seie at dei er frå Frosta, så det blir bra for folk å bli ferdig med dette, legg han til.

Om lag 72 kilometer frå den vesle kommunen, i Frostating lagmannsrett, starta ankesaka mot Arne Bye i dag.

Den tidlegare kommuneoverlegen og fastlegen i Frosta er dømd for 70 valdtekter og 82 tilfelle av å ha misbrukt si stilling for å oppnå seksuell omgang.

I ankesaka skal lagmannsretten avgjere kva straff Bye skal få for det desse lovbrota, som han er dømd for.

Ber om at Bye blir vurdert på mildaste måte

– Det vil bli lagt ned påstand om at Arne Bye blir vurdert på mildaste måte.

Det seier Linn Haug Holm i Frostating lagmannsrett. Ho er ei av tre som forsvarer Arne Bye i ankesaka.

– Bye blei dømd til 21 år i fengsel, men det har skjedd ei endring i straffelova med verknad den 1. juli 2025, seier forsvarar Eirik Svingen Bjørgo.

For når lagmannsretten no skal behandle Bye si anke over straffeutmålinga, gjer ei lovendring at maksimalt kan dømmast til 16 år i fengsel.

Dette er begge partane einige om.

– Påstand frå påtalemakta si side er fengsel i 16 år, då me ikkje kan seie at det er grunnlag for frådrag i dette maksimalnivået.

Det seier statsadvokat Rikhard Haugen Lyng i retten.

Det er sett av tre dagar til behandling av ankesaka i Frostating lagmannsrett.

– Me må stå i det saman

Samstundes som ankesaka går for retten, er kommunen godt i gang med å totalrenovere legekontoret i Frosta.

– At det blir sett eit slags punktum for den delen av saka trur eg bryr veldig mykje for dei som er direkte involvert og også for bygda.

Det seier leiar for sanitetsforeininga i Frosta, Kirsten Ulriksen Skogseth.

– Alle me på Frosta kjenner nokon som har hatt det vanskeleg i denne saka. Så me har fått øve oss på å vere gode sambygdingar, gode vener og gode slektningar.

– Kva tenker du om vegen framover?

– Me må stå i det og me må stå i det saman. Støtte kvarandre og godta at folk reagerer forskjellig og kjem seg ut av dette i kvar si takt og sitt eige tempo.

Tove Røddesnes er koordinerande bistandsadvokat for dei fornærma kvinnene. Ho fortel at det er ei lette for dei fornærma kvinnene å sleppe å forklare seg i lagmannsretten.

– Samstundes er det ei belasting, det er helseopplysingar om dei og det er video som er svært sensitiv. Så det er ei belasting å vere ein del av det.

Røddesnes fortel at mange av dei fornærma kvinnene er i traumebehandling og er på veg tilbake.

– Dei står framleis i ein berg-og-dal-bane. Vi merker at belastinga framleis er veldig høg.

Forsvarar om Bye: – Han har det tungt

Arne Bye kom inn i rettssal 206 i Frostating lagmannsrett like før ankebehandlinga starta klokka 09.00.

– Han har det tungt. Det er svært krevjande for han å vere, seier forsvarar Frode Wisth.

Bye sette seg ned mellom dei tre forsvararane sine, like overfor påtalemakta.

Då retten blei sett begynte Bye å notere og hadde med seg seks pennar i forskjellige fargar.

Gjennom heile dagen sat han konsentrert og roleg – slik han også gjorde i tingretten.

Bye skal forklare seg i retten torsdag.

– Arne Bye vil forklare seg om personlege forhold og omstende rundt dei straffbare forholda som er gjort, seier Haug Holm.

I tillegg les både forsvararane og påtalemakta opp enkelte delar av tingretten sin dom og skal vise eit utval av videoane frå legekontoret.

– Retten er nøydd til å ha eit representativt utdrag. Dei må ha mogelegheit til å gjere seg opp ei meining om kor grovt dette har vore. Eller kor lite grovt det har vore, seier forsvarar Bjørgo.