Nordmann sakna i Polen – Kripos kopla på saka

Ein mann i 20-åra frå Sunnfjord er sakna i Polen.

Det bekreftar lokalt politi overfor NRK.

– Me mottok ei saknamelding laurdag kveld, og fekk opplyst at vedkommande hadde vore sakna sidan laurdag morgon, seier politioverbetjent Oda Elvegård Thorstad ved Sunnfjord politistasjon.

Mannen var i Polen på ein venetur saman med to andre.

Han var sist sett på ein utestad i Warszawa, der han var saman med dei to venene sine.

Samarbeid med Kripos og polsk politi

Både Kripos og polsk politi er kopla på i etterforskinga.

– Me jobbar med å hente inn fleire detaljar om kva slags undersøkingar politiet i Polen har gjort så langt, seier ho.

Ho seier det ikkje er aktuelt å sende politi frå Noreg til Polen.

– Dei har starta si eiga etterforsking i Polen, og så har me vår herifrå.

NRK har vore i kontakt med Utanriksdepartementet. Dei har førebels ikkje kommentert saka.