Slik kan du avsløre falske QR-kodar

– Det er rett og slett berre trist at det finst nokon der ute som legg ned mykje arbeid i å prøve å lure andre menneske, seier landssjef i EasyPark Stian Andre Holst.

Det vart slått alarm i Kristiansand då det var oppdaga falske QR-kodar på parkeringsautomatar i byen i førre veke

Kodane var klistra på automatane.

Enkel metode

Det var parkeringsvakter som oppdaga at noko ikkje var som det skulle.

Over 20 klistremerke vart fjerna.

– Det var klistra QR-kodar på automatane i eit forsøk på å lokke folk inn på ei falsk nettside, sa Tor Stea i Kristiansand kommune.

Bruk av QR -kodar har blitt ein del av kvardagen vår. Og spesielt under covid-pandemien auka bruken.

Datatilsynet ber folk vere kritiske og bruke ein enkel metode for å sjekke om ein QR-kode er ekte eller falsk, før du trykker deg vidare.

– På same måte som ein får e-postar med ukjente og skumle lenker. Når du skannar ein QR-kode på telefonen kan ein sjå adressa som dukkar opp før ein trykker på den. Det anbefaler vi at ein gjer, seier spesialrådgjevar i Datatilsynet, Eirik Gulbrandsen.

Ber folk følgje med

Ifølge Datatilsynet har ikkje falske QR-kodar vore eit stort problem i Noreg til no.

Men dei følgjer med.

– Vi ser ikkje på dette som noko stort problem, og har ikkje fått indikasjonar på at dette har eit stort volum. Men vi oppfordrar jo alle til å vere ekstra merksame når ein skannar kodar og følgjer litt med på kor adressa leier, seier Gulbrandsen.

Easypark har åtvara kundane sine mot falske QR-kodar og falske e-postar på nettsidene sine i halvtanna år.

– Vi har vore førebudde på at dette kan komme også i Noreg. Så håpar vi at ikkje publikum lèt seg lure av desse falske klistremerka, seier Holst.

Han meiner Noreg har ein liten fordel samanlikna med andre land, spesielt når det gjeld betaling for parkering.

– Folk i Noreg er ikkje vant med å bruke QR-kode for parkering. Vi anslår at over 90 prosent bruker appar på telefonen når dei skal betale for parkering, seier han.