Synshemma ungdommar blir haldne utanfor: – Skulen meinte det var for vanskeleg

– Eg sat heime og såg snaps av vennene mine som var på hyttetur, fordi skulen meinte det var for vanskeleg å leggje til rette for synshemma på ein slik tur, seier Silje Solvang.

Ho er turleiar på leir for blinde og svaksynte ungdommar, og styreleiar i Noregs Blindeforbunds Ungdom. Leiren blir arrangert for tredje gong, og går føre seg på Geilo.

Kart og kompass

– No skal alle deltakarane lære seg å lage mat på stormkjøkken. Det er noko av det me skal gjera på turen, seier Solvang.

Dei lærar alt frå å bruke kart og kompass, til å lage mat og setje opp telt. Målet er å gi ungdommane meistring og sjølvtillit. Og ein sjanse til å delta i fellesskap som tidlegare har vore utilgjengelege.

– Me brukar våre eigne sansar. Det taktile, er vel det me brukar for å ta oss fram i dette her, seier Shazab Mohammed, ein av deltakarane på leiren.

Ein «random» tur

Tiril Wiksèn Elofsson har berre 10 prosent syn, men det stoppar ikkje henne frå å vera aktiv ute.

– Eg synest det er veldig gøy å vera i aktivitet. Det er noko alle er, seier ho.

For mange er det å lære praktiske ferdigheiter ein viktig veg inn i fellesskapet.

– Det hjelper ikkje å berre melde seg på ein «random tur», og tenkje at det går bra om ein ikkje har fått tilrettelegginga og lært, seier turleiaren Solvang.

Ho fortel at ein treng å lære gjennom hendene, og andre sansar enn synet. Slik at ein kan meistre naturen på eiga hand.

Telt i ei veke

Leiren er finansiert med stønad frå Landsrådet for Noregs barne- og ungdomsorganisasjonar (LNU), og blir driven på frivillig basis.

– Alle me tillitsvalde arbeider frivillig, så me er avhengige av slike eldsjeler som lyst å vera turleiarar, og ta initiativ til slike turar som dette. Dei hjelper oss heile turen, og bidreg med alt frå ledsaging til å hjelpe der det trengst, seier Solvang.

Ho håpar fleire kan få kjenne på meistringskjensla ho sjølv har opplevd, og at fleire får høve til å bli med.

– Eg har sove ute ei veke. Eg har lært å setje opp hengekøye, og mitt eige telt. Då blir terskelen lågare for at ein skal kunne vera med, seier ho.