Kjøpte gard og laga hasjplantasje i møkkakjellaren – no er sju menn dømt

Den yngste av mennene er i 20-åra, mens den eldste er i 60-åra. Fleire av mennene er i familie.

Mennene stod tiltalt for å ha produsert ei «svært betydeleg mengde» cannabis på ein gard i Indre Fosen i Trøndelag.

Alle dei sju mennene har blitt dømt til fengsel.

Dei er også dømt etter den såkalla «mafiaparagrafen».

Lukta gjorde at politiet blei varsla

Politiet gjekk til aksjon mot garden i november i 2024.

Det var tollvesenet som først varsla politiet om garden etter at dei hadde haldt auge med han på avstand.

– Fleire gongar kom vindkast med ein eim som kunne minne om marihuana, fortalde statsadvokat Per Morten Schjetne da saka gjekk for retten.

Same dag som dei blei varsla gjekk politiet til aksjon.

I møkkakjellaren i fjøsen fann dei store rom der cannabis blei dyrka.

I fjøsen fann dei også eigne «klipperom» der blada blei klippa av marihuanaplantane, og tørkerom der plantane blei tørka.

Plantasjen var også utstyrt med lager og utstyr for å vakuumpakke det ferdige produktet.

Politiet fann 1392 plantar som stod i potter, samt 640 tørka cannabisplantar.

Tingretten skriv i dommen at garden var innretta «som en stor og moderne produksjonsvirksomhet».

Påtalemakta meinte dette tilsvarte 126 kilo «røykbart materiale».

Under rettssaka meinte fleire av forsvararane at retten måtte legge eit langt lågare tal til grunn og peikte mellom anna på at delar av planten utan verkestoff i seg var blitt att med.

Tingretten er ikkje einig i dette og i dommen legg retten til grunn at beslaget var på 123,4 kilo cannabis.

Meiner garden blei kjøpt for plantasjedrift

Ein av mennene kjøpte garden sommaren 2020 for 560.000 kronar.

I retten fortalde han at planen var å pusse opp garden for så å selje han vidare.

Tingretten meiner det er tydeleg at planen var å lage ein hasjplantasje da garden blei kjøpt.

To av dei dømte mennene dreiv saman eit transportfirma.

Retten meiner dei to har vore heilt sentrale i å levere naudsynte leveransar til plantasjen på Fosen.

Ein av disse mennene er også dømt for å ha smugla over 18.000 liter brennevin og 3,2 millionar sigarettar inn i landet.

Bad om til saman 45 år fengsel

Første dag i retten blei mennene bedt om å ta stilling til det dei var tiltalt for.

Ein av mennene erkjente straffskuld etter tiltalen, mens fire erkjente delvis straffskuld. Dei to siste mennene nekta straffskuld.

Statsadvokat Per Morten Schjetne bad om til saman 45 år i fengsel for mennene.

Dei sju mennene hadde ulike roller og var i ulik grad knytt til etableringa og drifta av plantasjen. Derfor har også tingretten målt ut ulik straff.

Mannen som også er dømt for å ha smugla brennevin og sigarettar er dømt til ti år i fengsel.

Tre av mennene er dømt til mellom seks år og åtte månader og seks år og fire månader, mens ein får fengsel i fem år og seks månader.

Dei to som får lågast straff er dømt til fire år og åtte månader og fire år og tre månader i fengsel.

Dommen slår også fast at gardseigedommen på Fosen blir inndratt.